Tartyl Fest: taǵy bir óskemendik qatysýshy jeńiske jetti

ASTANA. QazAqparat – Tartyl Fest respýblıkalyq týrnıriniń grand-fınalynda 18-30 jas aralyǵynda 80 keliden joǵary salmaq dárejesi boıynsha óskemendik Evgenıı Sozonchýk jeńiske jetti, dep habarlaıdy QazAqparat tilshisi.

«Tartyl Fest» grand-fınalynyń taǵy bir salmaq dárejesi boıynsha jeńimpazy belgili boldy. 18-30 jas aralyǵynda 80 keliden joǵary salmaq dárejesi boıynsha baq synaǵan óskemendik Evgenıı Sozonchýk jeńis tuǵyryna kóterildi. Onyń kórsetkishi – 38 ret.

Eske salsaq, QR Prezıdenti janyndaǵy «DARA» talanttardy qoldaý qorynyń bastamasymen uıymdastyrylǵan týrnırdiń aqtyq synyna óńirlik irikteý jarystarynda úzdik nátıje kórsetken 170 sportshy qatysady. Qatysýshylardyń jasy – 11-51 jas aralyǵynda.

Týrnıkke tartylý jarysy byltyr Qazaqstannyń 20 qalasynda ótti. Onda 7 myńnan astam qazaqstandyq 9 salmaq dárejesinde saıysqa túsip, 33 jastaǵy tarazdyq Evgenıı Nam 50 ret kórsetkishpen týrnır rekordyn ornatqan.

EXPO aýmaǵyndaǵy Kongress ortalyqta ótip jatqan grand-fınaldan «Jibek Joly» telearnasy tikeleı kórsetilim taratady.

Grand-fınaldyń jalpy júlde qory – 54 mln teńge. Óz salmaq dárejesi boıynsha 1-oryn alǵan jeńimpazdarǵa 3 mln teńge, 2-oryn alǵandarǵa 2 mln teńge, 3-oryn ıelengenderge 1 mln teńge syıaqy beriledi.

Bul grand-fınalda chempıon atanǵandar Street Workout boıynsha álem chempıonatynda Qazaqstan atynan saıysqa túse alady.