Tartyl Fest: qostanaılyq Aıbek Qapanov jeńimpaz atandy
ASTANA. QazAqparat – Tartyl Fest respýblıkalyq týrnıriniń grand-fınalynda 18-30 jas aralyǵynda 65 kelige deıingi salmaq dárejesi boıynsha Aıbek Qapanov jeńimpaz atandy, dep habarlaıdy QazAqparat tilshisi.
18-30 jas aralyǵynda 65 kelige deıingi salmaq dárejesi boıynsha synǵa túsken atletter arasynda qostanaılyq Aıbat Qapanovtyń baǵy jandy. Ol 46 ret tartylyp, óz sanaty boıynsha jeńimpaz atandy.
Buǵan deıin habarlaǵanymyzdaı, qazir elordadaǵy Kongress ortalyqta Tartyl Fest respýblıkalyq týrnıriniń grand-fınaly ótip jatyr.
Eske salsaq, QR Prezıdenti janyndaǵy «DARA» talanttardy qoldaý qorynyń bastamasymen uıymdastyrylǵan týrnırdiń aqtyq synyna óńirlik irikteý jarystarynda úzdik nátıje kórsetken 170 sportshy qatysady. Qatysýshylardyń jasy – 11-51 jas aralyǵynda.
Týrnıkke tartylý jarysy byltyr Qazaqstannyń 20 qalasynda ótti. Onda 7 myńnan astam qazaqstandyq 9 salmaq dárejesinde saıysqa túsip, 33 jastaǵy tarazdyq Evgenıı Nam 50 ret kórsetkishpen týrnır rekordyn ornatqan.
EXPO aýmaǵyndaǵy Kongress ortalyqta ótip jatqan grand-fınaldan «Jibek Joly» telearnasy tikeleı kórsetilim taratady.
Grand-fınaldyń jalpy júlde qory – 54 mln teńge. Óz salmaq dárejesi boıynsha 1-oryn alǵan jeńimpazdarǵa 3 mln teńge, 2-oryn alǵandarǵa 2 mln teńge, 3-oryn ıelengenderge 1 mln teńge syıaqy beriledi.
Bul grand-fınalda chempıon atanǵandar Street Workout boıynsha álem chempıonatynda Qazaqstan atynan saıysqa túse alady.
