Tartyl Fest: Qostanaıda festıval 5 jasar sábıdi bir mınýt únsizdikpen eske alýdan bastaldy
Festıval Qostanaı oblysynda qaıtys bolǵan bes jasar Mádına Erlanqyzyn bir mınýt únsizdikpen eske alýdan bastaldy. Eske salsaq, sábıdi búkil oblys bolyp izdedi. 10 tamyzda izdeýde júrgen búldirshinniń denesi tabyldy. Ol jasandy sý qoımasyna batyp ketken.
Qaıǵyly oqıǵaǵa baılanysty Tartyl Fest festıvaliniń kontserttik shoý-baǵdarlamasy, oıyn-saýyq bólimi ótkizilmedi. Sondaı-aq, sharanyń hedlaıneri – oryndaýshy 2Rar kontsert qoımaıdy.
Festıval qaladaǵy City center ortalyǵynda ótip jatyr. Qatysýshylardy tirkeý, tarazylaý jáne nómir berý 9:00-den 12:00-ge deıin júrgizildi.
Festıvalge qatysýǵa barlyǵy 276 adam tirkelgen.
Uıymdastyrýshylardyń aıtýynsha, sharaǵa qatysýshylardyń eń kishisi – 8 jasta. Qostanaı qalasynyń 66 jastaǵy turǵyny jasy eń úlken qatysýshy retinde tirkelgen.
Festıvalge 20 qaladan kelgen qatysýshylarǵa ereje ortaq – durys jáne kóp tartylý.
Qatysýshylar salmaǵy men jasyna qaraı 9 sanat boıynsha synǵa túsedi. Jarys resmı qazylar alqasynyń qatysýymen ótedi.
Qatysýshylardyń sanattary:
18 jasqa deıin (jasóspirimder):
1) salmaǵy - 55 kg deıin;
2) salmaǵy - 55-ten 70 kg-ǵa deıin;
3) salmaǵy - 70 kg jáne odan joǵary;
18 jastan 30 jasqa deıin (jastar):
4) salmaǵy - 65 kg deıin;
5) salmaǵy - 65-ten 80 kg-ǵa deıin;
6) salmaǵy - 80 kg jáne odan joǵary;
30 jas jáne odan joǵary (eresekter):
7) salmaǵy - 80 kg deıin;
8) salmaǵy - 80-nen 90 kg-ǵa deıin;
9) salmaǵy - 90 kg jáne odan joǵary.
Shara maqsaty – buqaralyq sportty damytý jáne jastardy salaýatty ómirge baýlý, uıymdastyrýshysy – QR Prezıdenti janyndaǵy «Dara» daryndylardy qoldaý qory.
Festıval 10 shilde men 6 qyrkúıek aralyǵynda elimizdiń 20 qalasynda uıymdastyrylyp jatyr, jeńimpazdarǵa aqshalaı syılyqtar beriledi.
Ár qaladan 27 jeńimpaz irikteledi.
Birinshi oryn úshin ár sanattaǵy qatysýshylar 200 myń teńge aqshalaı syılyq alady; ekinshisine – 100 myń teńge; úshinshige – 50 myń teńge.
Óńirlerdegi jeńimpazdar Nur-Sultan qalasynda 8 qyrkúıekte ótetin grand-fınalǵa qatysady. Grand-fınaldyń júlde qory – 54 mıllıon teńge. Grand-Ffnal chempıondary Street workout boıynsha álem chempıonatyna qatysa alady.
Joba ambassadory – qoǵam qaıratkeri, jattyqtyrýshy jáne akter Aıtym Jaqypov. Ol Qazaqstan jáne álem boıynsha street workout-tyń birneshe dúrkin jeńimpazy, Streetlifting boıynsha Eýropa rekordsmeni, sondaı-aq Qazaqstandaǵy streetworkout qozǵalysynyń negizin qalaýshylardyń biri.
Street workout – kóshedegi sport alańdarynda túrli jattyǵýlar oryndalatyn áýesqoı sport túri.
Eske sala keteıik, «Tartyl Fest» týrnıkke tartylý boıynsha respýblıkalyq sport festıvali Qonaev qalasynda bastalǵan bolatyn. Sondaı-aq, buǵan deıin festıval Taldyqorǵan, Almaty, Taraz, Shymkent, Túrkistan, Qyzylorda, Atyraý, Oral, Aqtaý qalalarynda jalǵasyn tapty.
