Tartyl Fest: Іlııas Muqyshev 18 jastaǵylar arasynda 70 keli salmaq boıynsha jeńimpaz atandy
ASTANA. QazAqparat – Tartyl Fest respýblıkalyq týrnıriniń grand-fınalynda semeılik Іlııas Muqyshev 18 jastaǵylar arasynda 70 keli salmaq boıynsha jeńimpaz atandy, dep habarlaıdy QazAqparat tilshisi.
«Men Street Workout jáne sambo sportymen aınalysamyn. Elimizde basqa memleketterde joq osyndaı keremet joba qolǵa alynǵanyna qýanyshtymyn. Grand-fınalda jeńiske jetkenimen qýanyp turmyn jáne jaqyndaryma kóp rahmet aıtqym keledi. Eń bastysy, ata-anam qýansa boldy», - dedi Іlııas Muqyshev óz nátıjesin bilgennen keıin.
Sportshy aldaǵy jospary týraly pikir bildirdi.
«Meniń maqsatym – sporttyń Street Workout túrin nasıhattaý. Óz elimniń atynan álemdik deńgeıdegi týrnırge qatysqym keledi», - dedi Іlııas Muqyshev.
Buǵan deıin habarlaǵanymyzdaı, qazir elordadaǵy Kongress ortalyqta Tartyl Fest respýblıkalyq týrnıriniń grand-fınaly ótip jatyr.
Eske salsaq, QR Prezıdenti janyndaǵy «DARA» talanttardy qoldaý qorynyń bastamasymen uıymdastyrylǵan týrnırdiń aqtyq synyna óńirlik irikteý jarystarynda úzdik nátıje kórsetken 170 sportshy qatysady. Qatysýshylardyń jasy – 11-51 jas aralyǵynda.
Týrnıkke tartylý jarysy byltyr Qazaqstannyń 20 qalasynda ótti. Onda 7 myńnan astam qazaqstandyq 9 salmaq dárejesinde saıysqa túsip, 33 jastaǵy tarazdyq Evgenıı Nam 50 ret kórsetkishpen týrnır rekordyn ornatqan.
EXPO aýmaǵyndaǵy Kongress ortalyqta ótip jatqan grand-fınaldan «Jibek Joly» telearnasy tikeleı kórsetilim taratady.
Grand-fınaldyń jalpy júlde qory – 54 mln teńge. Óz salmaq dárejesi boıynsha 1-oryn alǵan jeńimpazdarǵa 3 mln teńge, 2-oryn alǵandarǵa 2 mln teńge, 3-oryn ıelengenderge 1 mln teńge syıaqy beriledi.
Bul grand-fınalda chempıon atanǵandar Street Workout boıynsha álem chempıonatynda Qazaqstan atynan saıysqa túse alady.
