Tartyl Fest: Aqtaý turǵyny týrnıkke tartylýdan jańa rekord ornatty
«Tartyl Fest» festıvali Aqtaý qalasynda bıyl osymen toǵyzynshy ret uıymdastyrylyp otyr. Týrnır qala jaǵalaýynda ornalasqan amfıteatrda ótip jatyr. 3 tamyzda saǵat 9:00-den 11:00-ge deıin qatysýshylar tirkeýden ótip, salmaq ólshep, keıin qatysýshy nómirin aldy. Jarys Aqtaý ýaqytymen 19:00-de bastaldy. Qazir de ol aıaqtalýǵa jaqyn.
Týrnır barysynda 32 jastaǵy qatysýshy Damır Nábıev jańa rekord ornatty. Ol týrnıkke 44 ret tartyldy. Buǵan deıingi rekord 23 shildede Shymkentte ótken festıval barysynda tirkelgen edi. Ol joly týrnırge qatysýshy Azamat Saper beltemirge 41 ret kóterildi.
Festıvalge qatysýshy 20 qalanyń turǵyndaryna ereje birdeı. Ol – týrnıkke durys ári kóp tartylý. Qatysýshylar salmaǵy men jasyna baılanysty toǵyz sanatta baq synaıdy. Jarys resmı tóreshiler alqasynyń qatysýymen ótedi.
Uıymdastyrýshylar málimetinshe, Aqtaýdaǵy festıval aıaqtalǵannan keıin keshtiń arnaıy qonaǵy - belgili qazaqstandyq ánshi Nurjan Kermenbaev óner kórsetedi.
«Tartyl Fest» Qazaqstan Respýblıkasy Prezıdenti janyndaǵy «Dara» talanttardy qoldaý qorynyń qoldaýymen ótip jatyr.
