Tartyl Fest: 51 jastaǵy qostanaılyq rekord jańartty
Qostanaılyq Andreı Antonıannyń jasy 51-de, ol týrnıkke 45 ret tartyldy. Osylaısha, festıvaldiń buǵan deıingi qatysýshylary ornatqan rekordty jańartty.
Festıval qaladaǵy City center ortalyǵynda ótip jatyr. Festıvalge qatysýǵa barlyǵy 276 adam tirkelgen. Uıymdastyrýshylardyń aıtýynsha, sharaǵa qatysýshylardyń eń kishisi – 8 jasta, eń úlkeni – 66 jasta.
Festıval Qostanaı oblysynda qaıtys bolǵan bes jasar Mádına Erlanqyzyn bir mınýt únsizdikpen eske alýdan bastaldy. Eske salsaq, sábıdi búkil oblys bolyp izdedi. 10 tamyzda izdeýde júrgen búldirshinniń denesi tabyldy. Ol jasandy sý qoımasyna batyp ketken. Qaıǵyly oqıǵaǵa baılanysty Tartyl Fest festıvaliniń kontserttik shoý-baǵdarlamasy, oıyn-saýyq bólimi ótkizilmedi. Sondaı-aq, sharanyń hedlaıneri – oryndaýshy 2Rar kontsert qoımaıdy.
Festıvalge 20 qaladan kelgen qatysýshylarǵa ereje ortaq – durys jáne kóp tartylý.
Qatysýshylar salmaǵy men jasyna qaraı 9 sanat boıynsha synǵa túsedi. Jarys resmı qazylar alqasynyń qatysýymen ótedi.
Qatysýshylardyń sanattary:
18 jasqa deıin (jasóspirimder):
1) salmaǵy - 55 kg deıin;
2) salmaǵy - 55-ten 70 kg-ǵa deıin;
3) salmaǵy - 70 kg jáne odan joǵary;
18 jastan 30 jasqa deıin (jastar):
4) salmaǵy - 65 kg deıin;
5) salmaǵy - 65-ten 80 kg-ǵa deıin;
6) salmaǵy - 80 kg jáne odan joǵary;
30 jas jáne odan joǵary (eresekter):
7) salmaǵy - 80 kg deıin;
8) salmaǵy - 80-nen 90 kg-ǵa deıin;
9) salmaǵy - 90 kg jáne odan joǵary.
Shara maqsaty – buqaralyq sportty damytý jáne jastardy salaýatty ómirge baýlý, uıymdastyrýshysy – QR Prezıdenti janyndaǵy «Dara» daryndylardy qoldaý qory. Joba ambassadory – qoǵam qaıratkeri, jattyqtyrýshy jáne akter Aıtym Jaqypov.
Festıval 10 shilde men 6 qyrkúıek aralyǵynda elimizdiń 20 qalasynda uıymdastyrylyp jatyr, jeńimpazdarǵa aqshalaı syılyqtar beriledi.
Ár qaladan 27 jeńimpaz irikteledi. Birinshi oryn úshin ár sanattaǵy qatysýshylar 200 myń teńge aqshalaı syılyq alady; ekinshisine – 100 myń teńge; úshinshige – 50 myń teńge.
Óńirlerdegi jeńimpazdar Nur-Sultan qalasynda 8 qyrkúıekte ótetin grand-fınalǵa qatysady. Grand-fınaldyń júlde qory – 54 mıllıon teńge. Grand-Ffnal chempıondary Street workout boıynsha álem chempıonatyna qatysa alady.
Eske salsaq, Aqtaý qalasynda ótken festıvalde 32 jastaǵy Damır Nabıev týrnıkke 44 ret tartylǵan bolatyn.
«Tartyl Fest» týrnıkke tartylý boıynsha respýblıkalyq sport festıvali Qonaev qalasynda bastaldy. Sondaı-aq, buǵan deıin festıval Taldyqorǵan, Almaty, Taraz, Shymkent, Túrkistan, Qyzylorda, Atyraý, Oral, Aqtaý qalalarynda jalǵasyn tapty.
