Tártiptik jazaǵa tartylǵan memlekettik qyzmetker joǵary laýazymǵa kóterile ala ma
ASTANA. QazAqparat - Búginde merıtokratııa negizderin, ıaǵnı adamnyń jeke qabiletterin baǵalap, onyń qyzmetin satylap ósirý júıesi aıasynda QR Memlekettik qyzmet isteri jáne sybaılas jemqorlyqqa qarsy kúres agenttigine «Tártiptik jazaǵa tartylǵan qyzmetker joǵary laýazymǵa kóterile ala ma?» degen saýaldar jıi túsedi, dep xabarlaıdy QazAqparat.
«Máselen, jaqynda mınıstrlikte jumys isteıtin bir qyzmetker tártiptik jazaǵa tartylǵanyn, basshylyq tarapynan eskertý alǵanyn jetkizip, osydan keıin ishki konkýrsqa, ıaǵnı joǵary laýazymǵa taǵaıyndaýǵa qatysa ala ma degen suraǵyn joldady. Jaýaby - Iá. Ondaı qyzmetker konkýrsqa qatysa alady. Sebebi tártiptik jazanyń sany ishki konkýrstarǵa qatysýǵa bóget bola almaıdy. Alaıda ondaı áreketter memlekettik qyzmettiń bedeline nuqsan keltirse, joǵary laýazymdarǵa arnalǵan konkýrstarǵa qatysýǵa ruqsat joq», - deıdi memlekettik qyzmet departamentiniń mindetin atqarýshy Jarqyn Tileýkenov.
Onyń aıtýynsha, memlekettik qyzmetker ákimshilik jaýapkershilikke tartylǵan jaǵdaıda da ishki konkýrstarǵa qatysýǵa bolady. Degenmen, ákimshilik jaza sybaılas jemqorlyqqa qatysty bolsa, ol adamnyń qujattary qabyldanbaıdy.
