Tártipsizdikter kezinde zardap shekkenderdiń nesıesi 3 aı keıinge shegeriledi

NUR-SULTAN. QazAqparat – Qazaqstandaǵy bankter tártipsizdikter kezinde zardap shekkenderdiń nesıesin 3 aı keıinge shegeredi. Bul týraly QR Qarjy naryǵyn retteý jáne damytý agenttigi Qarjylyq qyzmetterdi tutynýshylardyń quqyqtaryn qorǵaý departamentiniń dırektory Aleksandr Terentev aıtyp berdi, dep habarlaıdy QazAqparat.

«Elimizde TJ engizý saldarynan kóptegen kásipkerler, qarapaıym azamattar kommertsııalyq qyzmetin nemese jumysyn toqtatýǵa májbúr boldy. Osyǵan baılanysty olardyń tabysy tómendedi, kásipkerlik sýbektilerine aıtarlyqtaı materıaldyq zalal keldi, endi búlingen múlikti jóndeýge, bıznestiń qalypty rejımin qaıtarýǵa ýaqyt qajet. Osyǵan baılanysty bizdiń agenttik Prezıdenttiń tapsyrmasy boıynsha dereý banktermen, mıkroqarjy uıymdarymen jumys júrgizdi jáne barlyq kredıtorlar úshin qaryz ben mıkrokredıtterdiń barlyq túrleri boıynsha keıinge qaldyrýdyń biryńǵaı tártibin qabyldady. Keıinge shegerý barlyq zardap shekken zańdy jáne jeke tulǵalarǵa TJ engizilgen kúnnen bastap úsh aıǵa beriledi», - dedi Aleksandr Terentev Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, qaryzdar men mıkrokredıtter boıynsha keıinge shegerý kezeńinde barlyq bankter jáne mıkroqarjy uıymdary turaqsyzdyq aıybynyń, aıyppuldyń, ósimpuldyń somasyn eseptemeıdi.

Odan bólek, kredıtterdi óteý merzimin ótkizip alý jáne keıinge shegerý qaryz alýshynyń kredıttik tarıhyn nasharlatýǵa, ol týraly kredıttik bıýroǵa teris aqparat berýge negiz bolmaıdy.

«Keıinge shegerýdi alý úshin qaryz tóleýshi kez kelgen qoljetimdi baılanys tásilimen nemese kredıtordyń bólimshesine jeke baryp, erkin túrde ótinish jazýy qajet. Bul óte ıkemdi jumys, munda 2020-2021 jyldary berilgen keıinge shegerý joldary paıdalanyldy», - dedi Aleksandr Terentev.

Buǵan deıin spıker tártipsizdik kezinde qaza tapqan beıbit turǵyndardyń nesıesi keshiriletinin aıtqan edi.