Tártipsizdikter kezinde 8 óńirde 53 memlekettik jáne 151 ShOB nysany zardap shekken

NUR-SULTAN. QazAqparat – Úkimettiń búgingi otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev jappaı tártipsizdikter kezinde buzylǵan obektilerdi qalpyna keltirý sharalary týraly málimet berdi, dep habarlady QazAqparat tilshisi.

«Ákimdikterdiń jedel derekteri boıynsha el boıynsha 8 óńirde 53 memlekettik nysan jáne 151 shaǵyn jáne orta kásipkerlik nysany zardap shekti. Ákimdikter búlingen nysandardyń naqty sanyn kún saıyn jańartyp otyrady», - degen mınıstr memlekettik komıssııa bul másele boıynsha biryńǵaı qadamdyq is-qımyl algorıtmin ázirlegenin jáne obektilerdi qalpyna keltirý boıynsha naqty merzimder belgilengenin atady.

«Barlyq óńirlerde keltirilgen zalaldy tekserý jáne baǵalaý jónindegi tıisti komıssııalar quryldy.

Búgingi tańda aqaý týraly aktiler jasalyp, tehnıkalyq tekserý júrgizilýde. Keıin jedel tártipte kúrdeli jóndeý jáne qaıta qurý boıynsha jobalyq-smetalyq qujattama ázirlenedi.

Qalpyna keltirý jumystaryn bıýdjetten qarjylandyrý úshin mınıstrlik ákimdikter jetkizgen tizbe boıynsha qajetti qujattamany jınaıdy», - dedi Qaıyrbek Óskenbaev.