Tártipsizdik kezinde kóligi órtengen almatylyqtardyń shyǵyny ótelýi múmkin

ALMATY. QazAqparat - Almatyda jappaı tártipsizdik kezinde kóligi búlingenin dáleldegen júrgizýshilerge kelgen shyǵyndy óteý máselesi qarastyrylyp jatyr. Bul týraly Almaty ákiminiń orynbasary Іlııas Óserov aıtty, dep habarlaıdy QazAqparat tilshisi.

Óńirlik kommýnıkatsııalar qyzmetinde ótken onlaın brıfıng barysynda jýrnalıster ákimdik ókilderine qaladaǵy tártipsizdik kezinde búlingen kólik pen páter ıelerine memleket shyǵyndy óteı me degen suraq qoıdy.

Ákim orynbasary Іlııas Óserov zardap shekken kásipkerler men jeke tulǵalarǵa ótemaqy tóleý áli bastalmaǵanyn jetkizdi.

Sebebi, ótemaqy tóleý erejeleri jaqynda ǵana ázirlendi.

Bul erejelerdi úkimettik komıssııa ákimdikke jetkizgen kezde turǵyndar nazaryna usynylady.

«Turǵyndardyń tikeleı jeke múlkine keletin bolsaq, bul máselelerdi de pysyqtaımyz. Kóp jeke avtokólik zardap shekkeni túsinikti, jaı zaqymdanǵany, órtenip ketkenderi bar. Bul máseleni de qarastyryp jatyrmyz, zardap shekken halyq múmkin polıtsııaǵa aryz berýi kerek shyǵar. Eger olardyń kóligi qańtar oqıǵasy kezinde búlingeni rastalsa, ony óteý máselesin qarastyramyz. Onyń ishinde jeke tulǵalarǵa da»,- dedi ákim orynbasary Іlııas Óserov.

Eske salaıyq, Almatyda órtengen jáne oq tıgen 140 kólik aıyp turaǵyna qoıyldy.