Tártipsizdik kezinde qaza tapqan beıbit turǵyndardyń nesıesi keshiriledi - agenttik

NUR-SULTAN. QazAqparat – QR Qarjy naryǵyn retteý jáne damytý agenttigi Qarjylyq qyzmetterdi tutynýshylardyń quqyqtaryn qorǵaý departamentiniń dırektory Aleksandr Terentev eldegi tártipsizdikter kezinde qaza tapqan beıbit turǵyndardyń nesıesi qalaı óteletinin túsindirdi, dep habarlaıdy QazAqparat.

«Berilgen tapsyrmaǵa sáıkes, tártipsizdik kezinde qaza tapqan áskerı qyzmetshilerge beriletin nesıeler esepten shyǵarylady. Dál osyndaı jumysty agenttik tártipsizdikter kezinde qaza tapqan jeke tulǵalardyń tizimi boıynsha da júrgizedi. Qazirgi ýaqytta bul jumystar júrgizilip jatyr», - dep túsindirdi Aleksandr Terentev Ortalyq kommýnıkatsııalar qyzmetinde ótken baspasóz máslıhatynda.

Departament dırektory qaza tapqandardyń, zardap shekkenderdiń otbasylaryna kóńil aıtty.

«Almaty tragedııasyndaǵy barlyq qaıǵy-qasiret úshin kóńil aıtamyn», - dep tolyqtyrdy Aleksandr Terentev.

Aıta keteıik, búgin OKQ alańynda qarjy sektory elimizdegi qaıǵyly oqıǵalardyń saldarynan zardap shekken qaryz alýshylardy qoldaıtyny týraly baspasóz máslıhatyn ótkizip jatyr.