Tártip saqshysy jurttyń muń-muqtajyn tyńdap, oǵan kómektese alýy kerek – Túrkistandyq polıtseı
TÚRKІSTAN. QazAqparat - Polıtsııa qoǵamdyq tártip pen qylmystyq aldyn alýǵa tikeleı jaýapty memlekettik qyzmetshi. Qalyń kópshilikpen tyǵyz baılanysta jumys isteıtin atalmysh mamandyq ıelerin kúnde kórip júrgenimizben olardyń qyzmeti týraly kóp bile bermeımiz. Polıtsııa qyzmetkerleriniń kásibı merekeleriniń tusynda qoǵam tynyshtyǵyn kúzetýdiń qyr-syry týraly Túrkistan oblysynyń polıtseıi Ermahan Ábdramanov áńgimelep bergen edi.
Búginde Jetisaı aýdandyq polıtsııa bóliminiń bastyǵy qyzmetin atqaryp júrgen polıtsııa polkovnıgi eńbek jolyn 1996 jyly jedel ýákil bolýdan bastaǵan. Osyǵan qaraı áńgimesin óziniń eń alǵash ashqan qylmystyq isinen bastady. 
«Jetisaı aýdanyndaǵy bazarlardyń biri tonalyp, maǵan kúdiktini tabý tapsyryldy. Jan-jaqtan surastyra kelgende elimizge kelip, túrli kúmándi istermen aınalysyp júrgen Ózbekstan Respýblıkasynyń azamaty kúdik týdyrdy. Ony ustaýǵa kishi jedel ýákil ekeýmiz attanyp, onyń bir dámhanada otyrǵanyn bildik. Sol jerge baryp qarasaq, qylmysker tapshanda tamaqtanyp otyr eken. Baryp ustamaq bolǵanda ol ornynan yrshyp turady, qarasam boıy eki metr deneli kelgen er adam bolyp shyqty. Bizdi kóre sala ol qorǵandy asyp ótip, kórshi úıge qaraı sekirip ketti. Biz izine tústik, sóıtip júrip tórt úıden asyp óttik. Biraq men onyń úlkendigine qaramastan qýyp jetip, qolǵa túsirdim. Ony tipti qulatyp, kómekshim kelgenshe qolyna kisen de salǵanmyn. Aıtqym kelgeni ondaı kezde bizge qudaıdyń ózi kúsh-qýat beredi. Qylmysker boıshań nemese iri deneli bolsa da qolǵa tústi. Jalpy men qylmyskerdi ustaǵan kezde boıymda erekshe kúsh paıda bolady»,- deıdi Ermahan Ábdramanov.
Polıtseıdiń aıtýynsha, qyzmet barysynda ártúrli jaǵdaılar kezdesedi. Qylmyskerlerdiń de barlyǵy birdeı emes, olardyń da arasynda ábden tis qaqan, ákki, qýlary bolady. Alaıda, polıtsııa olardan da aqyldy, aılaker bolýy shart. Sol sebepti tártip saqshysy zaman aǵymyna saı ózin-ózi udaıy jetildirip, damytyp tyrýy kerek.
«Olaı bolmaǵan jaǵdaıda isińnen nátıje shyqpaıdy. Qyzmet barysynda nebir túrli jaǵdaılar bolady, nebir aıýandyq áreketterdiń de kýási boldyq. Biraq qandaı jaǵdaı bolǵan kúnde de polıtsııa qyzmetkeri ózine berik bolýy, kez-kelgen isti salqynqandylyqpen baıyppen qarastyrýy kerek. Bizdiń qyzmette emotsııa bolmaýy kerek. Taǵy bir esimde qalǵan jáıt, Shymkent qalasynda 7 jastaǵy qyzdy belgisiz bireý úıinde zorlap, qashyp ketken. Oqıǵa ornyna baryp kórsek, qyzdy aýrýhanaǵa alyp ketipti. Jansaqtaý bólimine jatqyzylǵan jetkinshektiń jaǵdaıy tym aýyr edi. Sol jaǵdaıyna qaramastan ol ózin jábirleýshiniń túr álpetin sýrettep aıtyp berdi. Jábirlenýshi qyzdyń sózinen málim bolǵanyndaı, ol syrtta oınap júrgende belgisiz bireý kelip sý suraǵan. Qyz úıge kirip sý alyp bermek bolǵanda, kúdikti onyń artynan kirip, aıaýsyz zorlyq áreketterin jasaǵan. Osy jaǵdaıdy estigen soń qalaı da kúdiktini tabamyn dep izdeýge kiristim. Buryn sottalǵandardy, nashaqorlardy, esepte turǵan azamattardy taýyp sóılestim. Basqa da aqparat kózderin surastyrdym. Aqyry seziktiniń jeke tulǵasyn anyqtadym. Ol buryn sottalmaǵan, kórshiles Jambyl oblysynyń turǵyny ekeni belgili boldy. Teksere kele onyń osy jastar shamasyndaǵy taǵy eki qyz balany zorlap qashyp júrgeni anyqtaldy. Sýretin jábirlenýshige kórsetip edim, birden tanydy. Osydan keıin seziktini kúndiz-túni izdestire bastadym. Kún demeı, tún demeı jertólelerdi qarastyrdym, bolýy múmkin degen jerlerge erinbeı baryp kórdim. Eńbegim esh ketpedi. Araǵa on kún salyp, onyń Shymkent qalasyndaǵy bir mazarda júrgenin anyqtadym. Bizge habarlaǵan adam menimen birge ony ustaýǵa mazarǵa bardy. Surastyra kelgenimizde onyń sol jerde máıitterdi jerleýge kómektesip, nápaqa taýyp júrgeni belgili boldy. Kylmyskerdi aqyry qolǵa túsirdik. Jaýap alý barysynda ol jasaǵan úsh qylmysyn da moıyndady, 20 jyldan astam merzimge sottaldy»,- deıdi Jetisaı aýdandyq polıtsııa bóliminiń bastyǵy.
Bas-aıaǵy 20 jyldan astam tájirıbesi bar polıtsııa polkovnıgi qylmyskerlerdi ustaý úshin tártip saqshysynyń bilimi men biliktiligi talapqa saı, sondaı-aq, halyqqa etene jaqyn, adamgershilik qasıeti mol bolýy qajet, jurttyń muń-muqtajyn tyńdap, soǵan kómektese alýy kerek deıdi.
«Qylmyskerdi ustaýyn ustaısyń-aý, alaıda onyń kinásin dáleldep shyǵý da ońaı sharýa emes. Eńbegin esh ketpeýi úshin dálelderdi tirnektep jınaısyń. Al mundaı árekettiń bir kúndik jumys emes ekenin ózderińiz de jaqsy bilesizder. Polıtsııa jumysyndaǵy eń basty másele ádildik ornap, kinálilerdiń kinásine saı jazalanýy»,- deıdi aýdandyq Polıtsııa bóliminiń bastyǵy.
Búginde 200-ge tarta tártip saqshysy bar Jetisaı aýdandyq polıtsııa bóliminde basshylyq qyzmet atqaratyn Ermahan Abdramanov kez-kelgen mamandyqtyń óz qıyndyǵy bar ekenin aıtady. Al, polıtsııa qyzmetinde basshy bolý úlken jaýapkershilikti qajet etedi.
«Basshy bolý men úshin bul ataq nemese abyroı emes. Iyǵyńa artylǵan úlken jaýapkershilik, senim. Qanshama taǵdyrlarǵa qatysty sheshim qabyldaıtyn kezder bolady. Mundaı ýaqytta men sol jáıtti múmkindiginshe taldap, saralap, durys sheshim qabyldaýǵa tyrysamyn. Ol úshin kóp jyldyq tájirıbem kómegin tıgizedi. Basshy ekenmin dep ózimdi joǵary ustamaı, neǵurlym halyqqa etene jaqyn bolýǵa barymdy salamyn. Basshy sonymen qatar tikeleı ahýaldy baıqap, soǵan qaraı jumysty uıymdastyra bilý kerek. Jeke quramdy soǵan jumyldyryp, baǵyttaýǵa áreket etemin. Óıtkeni halyq polıtsııadan qorqyp emes, kómek alýǵa keletindeı jaǵdaı jasaý kerek»,- deıdi Ermahan Ábdramanov.
Polıtsııa bólimi basshysynyń sózinshe, qazirgi tańda tártip saqshylarynyń januıasyna kóńil bólýge qoldary tımeıdi, olar ýaqytynyń basym bóligin jumysyna arnaıdy.
«Tańǵy saǵat altydan túngi on bir nemese on ekige deıin jumysta júretin kezderimiz bolady. Qylmys bolǵan kúnderi túnde de oqıǵa ornyna barasyń. Ondaı kezderi balalaryńdy tek uıyqtap jatqan sátin kóresiń. Balalarym keıde renjıdi, ýaqyt bólmeısiz dep. Biraq men múmkindiginshe bos ýaqytymdy otbasymda ótkizip, tipti mektepterindegi muǵalimderimen de sóılesýge tyrysamyn. Degenmen óz ómirimde osy mamandyqty tańdaǵanym úshin ókingen emespin. Óıtkeni men bul mamandyqty júrek qalaýymen tańdadym. Bolashaqta perzentterim de polıtsııa qyzmetkeri bolǵanyn qalar edim. Al, áriptesterime aıtarym, syn bar jerde durys jumys júredi. Sol synnan nátıje shyǵaryp jumys isteý kerek. Árbir polıtseıde Otanǵa degen súıispenshilik mol bolsa, halyq arasynda da bizdiń mamandyq týraly jaqsy pikir qalyptasady»,- deıdi polıtsııa polkovnıgi Ermahan Ábdramanov.
