Tártip saqshylary profılaktıkalyq esepte turǵan astanalyqtardy tekserip jatyr

Nur-Sultan qalalyq Polıtsııa departamentiń taratqan aqparatqa qaraǵanda, zań buzýshylyqtardyń aldyn alý, jolyn kesý jáne ishki ister organdarynda esepte turǵan adamdardy baqylaýda ustaý maqsatynda 19-23 qańtar aralyǵynda qala aýmaǵynda jedel-profılaktıkalyq is-shara ótkizilip jatyr.

Іs-shara ótkizilgen eki kún ishinde profılaktıkalyq esepte turǵan 360-qa jýyq tulǵa tekserildi. Tekserý barysynda esepke alynǵan tulǵalar tarapynan belgilengen shekteýlerdi buzýdyń 33 faktisi anyqtaldy. Onyń 16-sy shartty túrde merziminen buryn bosatylǵandardyń úlesinde. Máselen, jedel aldyn alý is-sharasy barysynda bas bostandyǵynan aıyrý oryndarynan bosatylǵannan keıin turaqty meken-jaıyna kelmegen 37 jastaǵy azamattyń turǵylyqty jeri anyqtaldy. Er adamǵa qatysty materıal ShQO-ǵa, turǵylyqty jerine jiberildi.

Otbasy-turmystyq qatynastar salasynda 50 zańbuzýshylyq anyqtaldy. Onyń ishinde 15 zańsyz is-áreket otbasynda bolǵan. 11 adam janjal úshin ustaldy.

Osy is-sharanyń maqsatynyń biri – kámeletke tolmaǵandardyń túngi ýaqytta eresektersiz turǵyn úıden tys jerde júrý jaǵdaılarynyń aldyn alý jáne anyqtaý. Reıd barysynda túnde qoǵamdyq oryndarda bolǵan 56 kámeletke tolmaǵan bala anyqtaldy, ata-analarǵa balalardy tárbıeleý boıynsha mindetterdi oryndamaǵany úshin jaýapqa tartylatyny eskertildi.