Tártip saqshylary «Kórshiler baqylaýy» jobasy aıasynda 932 zań buzý áreketin anyqtady
ASTANA. QazAqparat - Ótken jyly atalǵan shara aıasynda senim telefonyna 2 myńnan astam habarlama kelip túsken, dep habarlaıdy QazAqparat tilshisi Soltústik Qazaqstan oblystyq Polıtsııa departamentiniń baspasóz qyzmetine silteme jasap.
«Kórshiler baqylaýy» profılaktıkalyq baǵdarlamasynyń 8 (715-2) 61-20-02 senim telefonyna kelip túsken qońyraýlar táýlik boıy qabyldanady. Kez kelgen qala turǵyny óziniń aýlasynda ne bolmasa kóshesinde bolyp jatqan kúdikti jaǵdaılar týraly habar bere alady. Ótken jyly senim telefonyna 2 myńnan astam habarlama kelip tústi. Sonyń nátıjesinde 932 ákimshilik quqyq buzýshylyq anyqtalyp, 23 qylmys ashyldy. Olardyń ishinde kósh bastap turǵandary - belgilenbegen oryndarda saýda júrgizý, abattandyrý erejelerin buzý, sondaı-aq ıtter men mysyqtardy serýenge shyǵarý tártibin saqtamaý. Odan bólek, QR-da tirkeýsiz nemese jeke basty kýálandyratyn qujattyń bolmaýyna qatysty 114 ákimshilik hattama toltyryldy. Senim telefonyna kelip túsken 2149 qońyraýdyń 135-inde faktiler rastalmaǵan», -delingen departament habarlamasynda.
«Kórshiler baqylaýy» profılaktıkalyq sharasy oblys ortalyǵynda 2011 jyldan bastap jumys isteıdi. Ondaǵy maqsat - qoǵamdaǵy oqıǵalarǵa beıjaı qaramaıtyn azamattarmen birlesip, úıler men kóshelerde bolýy múmkin quqyq buzýshylyqtar men qylmystardyń ýaqtyly jolyn kesý. «Kórshiler baqylaýynyń» senim telefony táýlik boıy jumys isteıdi. Eger Siz jasalyp jatqan qylmystyń nemese quqyq buzýshylyqtyń kýágeri bolsańyz, kez kelgen ýaqytta jasyryn túrde habarlasyp, ol týraly baıandaı alasyz» - deıdi SQO Polıtsııa departamentiniń basshysy, polıtsııa polkovnıgi Jandos Muqatov.
Sonymen qatar, profılaktıkalyq toptyń qyzmetkerleri zańsyz alkogoldik ónimderdi satý oryndaryn anyqtaý boıynsha reıdtik is-sharalardy ótkizýde. Sol sııaqty turǵyndarmen ishimdiktiń saldarynan turmysta týyndaıtyn tártipsizdikter men quqyq buzýshylyqtardy boldyrmaý týraly profılaktıkalyq áńgimeler júrgiziledi.
Atalǵan óńirdiń tártip saqshylary úı aýlalary men kóshelerde qoǵamdyq tártipti nyǵaıtý maqsatynda qala turǵyndarynan azamattyq belsendilik tanytýǵa shaqyrady.
