Tártip saqshylary elorda turǵyndaryn karantın talaptaryn saqtaýǵa shaqyrdy

NUR-SULTAN. QazAqparat – Astanada epıdemıologııalyq jaǵdaı qubylyp tursa da, turǵyndardyń saqtyq sharalaryna beıjaı qaraýyn qoıatyn túri joq. Osyǵan baılanysty Nur-Sultan qalasy polıtsııa departamentiniń baspasóz qyzmeti karantın shekteýlerin baılanysty zań buzý kóbeıip ketkenin aıtyp, dabyl qaǵyp otyr, dep habarlaıdy QazAqparat.

«Polıtsııa ókilderi men eriktilerden, ákimdik jáne sanıtarlyq-epıdemıologııalyq baqylaý basqarmasy ókilderinen qurylǵan mobıldi toptar karantın rejıminiń saqtalýyn qadaǵalaýdy jalǵastyrady. Jyl basynan beri mobıldik toptar myńnan astam zańbuzýshylyqty tirkedi. Bas sanıtar dárigerdiń qoldanystaǵy qaýlysyna qaramastan, azamattar áli kúnge deıin oıyn-saýyq oryndaryna, kompıýterlik klýbtarǵa baryp júr. Sonyń saldarynan ózimen birge basqalardyń densaýlyǵyna qaýip tónip otyr. Bazarlarda, avtobýstarda, saıabaqtar men skverlerde sanıtarlyq normalar eskerilmeıdi», -dep jazady depertament qyzmetkerleri.

Polıtsııa vırýs juqtyrǵanyn bile turyp, qoǵamdyq orynǵa shyqqan adam ákimshilik jaza arqalaıtynyn eskertedi.

«Siz vırýstyq ınfektsııanyń tasymaldaýshysy bolýyńyz múmkin. Ony bilmegendikten mańaıyńyzdaǵylarǵa juqtyrasyz. Al adam aýrý ekenin bile turyp, maska kımese, adamdarǵa juqtyrýdy jalǵastyra berse, oǵan ákimshilik jaýapkershilik sharalary qabyldanady. Qabyldanyp jatqan sharalarǵa túsinistikpen qaraýǵa jáne quqyq qorǵaý organdarynyń jumysyna járdem kórsetýge shaqyramyz. Munyń bári Sizdiń jáne jaqyndaryńyzdyń ıgiligi úshin jasalady», - dep jazylǵan departament taratqan málimette.