Tártip saqshylary adam qaǵyp, qashyp ketken júrgizýshini ustady - OQO
ShYMKENT. QazAqparat - Ońtústik Qazaqstan oblysynyń tártip saqshylary jaıaý júrginshini qaǵyp, qashyp ketken júrgizýshini ustady. Arys-Túıetas tas jolynda oryn alǵan jol-kólik oqıǵasy saldarynan 61 jastaǵy turǵyn qaza tapqan bolatyn, dep habarlaıdy QazAqparat tilshisi.
Oblystyq ishki ister departamenti baspasóz qyzmetiniń habarlaýynsha, aǵymdaǵy jyldyń qarashasynda Arys-Túıetas tas jolynyń boıynda belgisiz er azamattyń múrdesi tabylǵan. Oqıǵa ornyna kelgen polıtseıler alpystan asqan er azamattyń jol-kólik oqıǵasynan qaza tapqanyn anyqtaǵan. Júrgizýshi jol-kólik oqıǵasy oryn alǵan jerden izin sýytady. Jol apatyna kináli kólik ıesin ustaý maqsatynda polıtseıler kúdiktiniń izine túsken. Saıram aýdandyq polıtsııa qyzmetkerleri jedel izdestirý is-sharasy barysynda jol-kólik oqıǵasyna qatysty degen kúdiktini qolǵa túsirdi. Ol Báıdibek aýdanynyń 1970 jyly týǵan turǵyny ekeni anyqtaldy. Sezikti tergeý barysynda óz kinásin moıyndady. Aıtýynsha, ol «Gazel» avtokóligimen jaıaý júrginshini qaǵyp, oqıǵa bolǵan jerden boı tasalaǵan. Keıin qaqqan adamnyń jaǵdaıyn da bilmegen.
Qazir osy oqıǵa boıynsha sotqa deıingi tergeý amaldary júrgizilip, júrgizýshiniń ústinen Qylmystyq kodekstiń 345 baby «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» jáne 347 baby «Jol-kólik oqıǵasy bolǵan jerden ketip qalý» boıynsha is qozǵaldy. Ol qamaýǵa alyndy.
