Tártip buzǵan Tóreǵalı úshin áýejaı qyzmetkerleri aıyppul tóleıtin boldy
ALMATY. QazAqparat - Bıleti joq adamnyń áýejaıdyń ushý aımaǵyna ruqsatsyz ótkeni úshin áýejaı qyzmetkerleri 200 myń teńgege jýyq aıyppul tóleıtin boldy, dep habarlaıdy QazAqparat tilshisi.
QR IDM Azamattyq avıatsııa komıtetiniń Feısbýktegi paraqshasynda jarııalanǵan aqparatqa sáıkes, ruqsaty joq jolaýshynyń ushý zonasyna kirýine baılanysty komıtet jospardan tys tekseris júrgizgen bolatyn.
«Atalǵan tekserý nátıjesinde QR ÁqbK 570-babynyń 1-bólimimen Almaty halyqaralyq áýejaıynyń avıatsııa qaýipsizdigi bólimi ınspektory Raqymgereev Rınat, Qyrǵyzbaev Abylaı, Zakırova Sholpan, «Eır Astana»kompanııasy jolaýshylarǵa qyzmet kórsetý agenti Abdrahıpova Karına jaýapkershilikke tartyldy. Olardyń árqaısysy 20 AEK mólsherinde (48100 tg), jalpy alǵanda 192000 teńge kóleminde aıyppul tóleıtin boldy» delingen jazbada.
Aıta ketý kerek, qyrkúıektiń 14 kúni Almaty-Gonkong baǵytyndaǵy reıste tótenshe oqıǵa oryn alǵan. Bıleti joq er adam ushaq bortyna ótip ketken. Keıin ol adamnyń óziniń otbasyn shyǵaryp salmaq bolǵan ánshi Tóreǵalı Tórealı ekeni anyqtaldy. Tótenshe jaǵdaıǵa baılanysty reıs 18 mınýtqa keshiktirildi.
