Tártibi jaqsy sarbaz 10 kún demalys alady - áskerı bólimnen fotoreportaj
ASTANA. KAZINFORM – Sarbazdar Otan aldyndaǵy boryshyn ótep, týǵan jerine oralǵanda «Ásker qalaı eken, ne istedińder?» dep jan-jaqtan qaýmalaıtyny belgili. Biz bul suraqtyń jaýabyn áskerı bólimge arnaıy baryp bilgendi jón kórdik. Sarbazdardyń bir kúndik ómirimen tanysyp, bir jyldyq ǵumyrynyń mánisine úńildik.
Astana qalasynyń irgesindegi 68665 áskerı bóliminde ornalasqan 36-erekshe maqsattaǵy brıgadaǵa at basyn burǵanymyzda áskerge shaqyrýshylar oqý-jattyǵý jıynynda júr eken. Áli sarbaz deý erterek shyǵar, sebebi jaqyn kúnderi ǵana ant qabyldamaq. Oǵan deıin áskerı ómirdiń qyr-syryna qanyǵyp, qarýdy qoldanýǵa mashyqtanyp jatyr. Ant qabyldaý rásimin asyǵa kútip júrgen sarbazdardyń biri Eldar Súıinbaı qýyrshaq teatrynda ártis bolyp eńbek etken.
«Jumys eshqaıda qashpas. Otan aldyndaǵy boryshty atqarýǵa zor qulshynyspen keldim. Jasyratyny joq, keıbir tanystarym áskerdi jaman jaǵynan aıtyp, kúmándi oılarǵa erik bergen edim. Áskerge kelgenime eki apta ýaqyt boldy, mundaǵy ómirdiń jigitterdi jigerli etýge, oń-solyn tanýǵa, Otanǵa degen mahabatty arttyrýǵa, jalpy jaqsy qasıetterdi sińirýge áseri mol ekenine kóz jetkizdim», - deıdi Eldar.
Atalǵan bólim Qurlyq áskerleriniń quramynda. 68665 áskerı bólim komandıriniń orynbasary - tárbıe jáne ıdeologııalyq jumystar jónindegi bólimniń bastyǵy, podpolkovnık Talǵat Qulmanovtyń aıtýynsha, áskerı bólim 2003 jyly qurylǵan.
Áskerı saladan habary az azamattar bile bermeýi múmkin, bul ásker – Qarýly Kúshterdiń elıtasy. Joǵarǵy Bas qolbasshynyń rezervi sanalady. Astana qalasyndaǵy qoǵamdyq tártipti qamtamasyz etip, beıbit jáne soǵys jaǵdaıynda qaýip tóngen aımaqtarǵa shuǵyl jetýge jáne kenetten týyndaǵan tapsyrmalardy oryndaýǵa jumyldyrylady.
Shekaraǵa jaqyn ornalasqan áskerlerge kómek kórsetiledi. Bitimgershilik operatsııalaryna qatysý mıssııasy taǵy bar. Mundaǵy Qurmet qaraýyly rotasy sarbazdary elimizge saparlap kelgen memleketterdiń prezıdentin, ózge de qurmetti meımandardy kútip alý sııaqty resmı is-sharalardyń basy-qasynda júredi. Al osyndaı mańyzdy mindetterdi múltiksiz oryndap kele jatqan brıgadanyń qatarynan tabylý – sarbazdarǵa zor abyroı!
«Bıyl kóktemde 150-den astam sarbaz Otan aldyndaǵy boryshyn abyroımen atqaryp, úılerine oraldy. Dese de, 30 paıyzy kelisimshart negizinde áskerı qyzmetin jalǵastyrýǵa nıet bildirdi. Al merzimdi áskerge shaqyrý kezeńinde elimizdiń birqatar óńirinen 200-ge jýyq jas qatarǵa qosyldy. Olar ázirge oqý-jattyǵý jıynynda tájirıbe jınaqtap júr. Jaqyn kúnderi ant qabyldaıtyn bolady», - dedi Talǵat Qulmanov.
Aıta ketý kerek, elimizdiń kóptegen aımaǵynda bolǵan sý tasqyny kezinde osy bólimniń 300 sarbazy (ofıtser, serjanttar da bar) Soltústik Qazaqstan oblysy Beskól aýdanynda apattyń aldyn alý jumystaryna jumyldyrylǵan. 21 kún boıy sý tasqynymen arpalysqan sarbazdarǵa oblys basshylyǵy, jergilikti turǵyndar alǵystaryn bildirip, qurmettep shyǵaryp salǵan.
Keıbireýler sarbazdar tańnan keshke deıin dalada jattyǵý jasap, kabınette bilim alyp otyrady dep oılaýy múmkin. Shyn máninde Otan qorǵaýshylarǵa bos ýaqytyn tıimdi ótkizý úshin barlyq jaǵdaı jasalǵan. Olar gazet-jýrnal oqyp, teledıdar kórip, mýzykalyq aspaptardyń súıemeldeýimen án salyp, kóńilderin kóteredi.
Kazarmanyń janynda shaǵyn fýtbol alańy, sport zaly da bar. 68665 áskerı bóliminiń sarbazdary jyl boıy áskerı bólimder arasynda uıymdastyrylatyn túrli sporttyq saıystarǵa qatysyp, júldeli oryndardy ıelenip júrgenin atap ótken jón.
Ár sarbazdyń ata-anasymen keri baılanys ornatylǵan. Olar úshin «Ashyq esik» kúni uıymdastyrylyp, áskerdegi ómirdi kórsetý dástúri qalyptasqan. Áskerı bólim bastyqtarynyń uıaly telefon nómiri ata-analarǵa berilgen. Kez kelgen ýaqytta baılanysyp, balasynyń jaǵdaıyn suraýǵa múmkindik bar. Biz júrgen kezde sarbazdardyń biriniń anasy habarlasyp, balasynyń densaýlyǵyn surap jatty.
Uıaly telefon demekshi, sarbazdarǵa aptasyna eki ret (senbi-jeksenbi) aǵaıyn-týyspen habarlasýǵa bolady. Aıtpaqshy, sarbazdarǵa jaqsy tártibi úshin 10 kúnge (jolǵa ketken kúnder esepke alynbaıdy) demalys beriledi. Ár aptanyń qorytyndysy boıynsha úzdik nátıje kórsetken sarbazdar bir kúnge seıildeýge bosatylatynyn da atap ótken jón.
Sarbazdardyń as máziri kópshilikti qyzyqtyratyny anyq. Bizge sarbazdarmen birge túski as ishý sáti tústi. Ashanadaǵy tamaqtar molynan úlestiriledi eken. Vıtamınder de taratylady. Talǵat Qulmanovtyń aıtýynsha, mundaǵy jaýyngerlik daıyndyqtyń qarqyny joǵary. Sáıkesinshe, kúsh kóp jumsalǵan saıyn as mólsheri de molynan úlestirilmek.
Iá, deni saý, aqyl-oıy jetilgen árbir azamat Otan aldyndaǵy boryshyn óteýge mindetti. Qazaqstannyń qorǵany bolar jastardyń jaman ádetterden arylyp, óz erkimen ásker qatarynan tabylyp, shen úshin emes el úshin qyzmet etýi mańyzdy.
