«Tarlanboz» jáne «Meniń jalǵyz serigim» atty sý jańa kitaptar oqyrmanǵa jol tartty (FOTO)

ASTANA. QazAqparat - Búgin Ulttyq akademııalyq kitaphanada Memlekettik syılyqtyń laýreaty, «Qurmet» jáne «Parasat» ordenderiniń ıegeri, M.Áýezov atyndaǵy Ulttyq júldeniń, halyqaralyq Sholaqov atyndaǵy júldeniń ıesi, tarıhı romandar avtory Dúkenbaı Dosjandy eske alý keshi ótip, «Tarlanboz» atty kitabynyń tusaýy kesildi. Sondaı-aq, Dúkenbaı Dosjannyń ómirdegi, ádebıettegi serigi Sáýle Dosjannyń asyl jaryna degen saǵynyshtan týǵan «Meniń jalǵyz serigim» atty kitaby oqyrmanǵa jol tartty.

Dúkenbaı Dosjan 2013 jyly qyrkúıektiń on tórtinde dúnıeden ótken. 1942 jyly surapyl soǵys kezinde týǵan Dúkenbaı nebary 15 jasynda «Kókpar» atty áńgimesin jazǵan eken. Al, qazirde jazýshynyń shyǵarmalary álemniń 20 tiline aýdarylyp, 3,7 mıllıon tırajben shyqqan. Jazýshy 24 jasynda «Otyrar» povesin jazyp, tarıhı romanǵa qalam tartqan alǵashqy qazaq jazýshylarynyń biri atanady. Aıta keteıik, bul kisi Ulttyq qaýipsizdik komıtetiniń jabyq arhıvine baryp, derek alǵan alǵashqy jazýshy. Sol arhıvtiń qujattary negizinde 1992 jyly «Túrme» jáne 1993 jyly Jeltoqsan oqıǵasy týraly «Alań» atty kórkem roman jazyp shyqqan.

Mine, búgin, jazýshyny eske alýǵa arnalǵan «Tarlanboz» kitabymen qatar, jazýshynyń aıaýly jary Sáýle Dosjannyń da «Meniń jalǵyz serigim» atty syrly kitaby jaryq kórdi. Sáýle Dosjan Dúkenbaı jazýshynyń murasyn saqtap, amanatyn arqalap keledi. Sondyqtan bolar, jazýshynyń ádebıeti men murasy oqyrmanǵa jetsin dep, jas urpaq oqyp-bilsin dep, búgin Ulttyq akademııalyq kitaphanadan Dúkenbaı Dosjanulyna arnap «Jazýshy» zalyn ashty. «Jazýshy» zalyna Dúkenbaı Dosjannyń kitaptary, marapattary, jazý ústeli men shyǵarmashylyǵynda tutynǵan zattary, estelik sýretter qoıylǵan.

Jalpy, Dúkenbaı Dosjandy eske alý keshine QR Parlamentiniń depýtattary, elimizge tanymal aqyn-jazýshylar, sondaı-aq, zııaly qaýym ókilderi qatysty. Kesh barysynda jazýshynyń ómiri men shyǵarmashylyǵyna arnalǵan derekti fılm jáne slaıd kórsetilip, jazýshy, teledramatýrg Sultan Orazalın, aqyn, Memlekettik syılyqtyń ıegeri Nesipbek Aıtuly, fılologııa ǵylymdarynyń doktory, professor Serik Negımov, qalamgerdiń jary, aqyn, QR eńbek sińirgen qaıratkeri, QR Májilisiniń qyzmetkeri, jazýshynyń jary Sáýle Dosjanova estelikterimen bólisti.