Tarlan Astana stantsııalarynda 10 ákimshilik quqyq buzýshylyq tirkeldi
ASTANA. KAZINFORM — Astanadaǵy Tarlan Astana LRT stantsııalarynda qoǵamdyq tártipti saqtaý jáne jolaýshylar qaýipsizdigin qamtamasyz etý boıynsha profılaktıkalyq sharalar kúsheıtildi.
Kólik prokýratýrasy men kólik polıtsııasynyń qyzmetkerleri birlesip, stantsııalarda jolaýshylarǵa qaýipsiz júrip-turý erejelerin túsindirip, ákimshilik jáne qylmystyq quqyq buzýshylyqtar úshin jaýapkershilik týraly aqparat berip jatyr.
— Sonymen qatar azamattarǵa quqyqtyq keńes berilip, arnaıy aqparattyq jadynamalar taratylyp jatyr, — delingen Bas kólik prokýratýrasynyń baspasóz qyzmeti taratqan habarlamada.
Tarlan Astana iske qosylǵannan beri barlyq stantsııa men poıyzda kólik polıtsııasynyń qyzmetkerleri táýlik boıy kezekshilik atqaryp keledi. Osy kezeńde jolaýshylardan túsken 34 ótinish qaralyp, 10 ákimshilik quqyq buzýshylyq boıynsha materıal rásimdelgen.
Budan bólek, qyzmetkerler jolaýshylar joǵaltyp alǵan 113-ten astam zatty ıelerine qaıtardy. Olardyń arasynda uıaly telefondar, sómkeler jáne basqa da jeke zattar bar.
Eske salaıyq, buǵan deıin Astanada jol erejesin buzǵan 19 myńnan astam jaıaý júrginshi jaýapqa tartylǵanyn habarlaǵan edik.
