Tarlan Astana: qalada birneshe baǵyt boıynsha stantsııalar salynady
ASTANA. KAZINFORM — Astana qalasynyń ákimi Jeńis Qasymbek Instagram paraqshasynda Tarlan Astana jeńil relsti kólik júıesiniń ekinshi kezeńi týraly jazdy, dep habarlaıdy elorda ákimdiginiń resmı saıty.
Tarlan Astana» jeńil relsti kólik júıesi iske qosylǵaly beri jolaýshylar tasymalynyń kólemi 11,5 mıllıonǵa jýyqtaǵan.
– Bul kólik túri qala turǵyndary arasynda suranysqa ıe bolyp, olardyń kúndelikti ómiriniń bir bóligine aınalyp keledi. Buǵan qosa elordanyń kólik ınfraqurylymyn ary qaraı damytýǵa baǵyttalǵan jobanyń ekinshi kezeńin iske asyrý jumysyn qatar júrgizip jatyrmyz. Qurylys jumysy birneshe baǵyt boıynsha júrip jatyr: Qosshy qalasyna qaraı tirekterdi, estakadalyq qurylymdar men stantsııalardy salý boıynsha qurylys-montaj jumysy júrip jatyr. Qazirgi ýaqytta 294 tirek (97%) ornatylyp, 385 estakadalyq qurylym (73%) montajdaldy. 2026 jyldyń sońyna deıin №401, 402 jáne 403 stantsııalarda betondaý jumysyn aıaqtaý josparlanyp otyr. Bul baǵytta barlyǵy úsh stantsııa salý kózdelgen. Jaǵalaý shaǵynaýdanyna qaraı joba aıasynda segiz stantsııa salý kózdelgen. Geologııalyq zertteý jumysy aıaqtaldy. Qazirgi ýaqytta qorshaýlar ornatý, sondaı-aq qurylys-montaj jumysyn bastaý úshin ınjenerlik jelilerdi kóshirý jáne qaıta ornatý jumysy júrip jatyr, - dep jazdy qala ákimi.
«Astana-1» temirjol vokzalyna qaraı baǵyt (oń jaǵalaý)
Bul baǵytta №201 aýysyp miný stantsııasyn esepke alǵanda, toǵyz stantsııa salý kózdelgen. Geologııalyq zertteý jumysy aıaqtaldy.
Syǵanaq dańǵylynyń boıynda (Qabanbaı batyr men Turan dańǵyldarynyń arasyndaǵy ýchaskede) №201/301 stantsııalarynyń aýysyp miný torabyn salý jumysy júrip jatyr.
Qazaq radıosy kóshesi men Qabanbaı batyr dańǵylynyń arasyndaǵy ýchaskede eki tirekke beton quıý jumysy aıaqtaldy. Sondaı-aq qadalar men arqalyqtardy ornatý jumysy júrip jatyr. Ózge ýchaskelerde aldaǵy qurylys-montaj jumysyna daıyndyq júrgizilip jatyr.
– Jeńil relsti kólik jelisin damytý – elordamyzda zamanaýı ári qolaıly kólik júıesin qalyptastyrý jolyndaǵy mańyzdy qadam, – dep jazdy Jeńis Qasymbek.
Qazaqstanda LRT nysandaryna arnalǵan polıtsııa basqarmasy qurylatynyn jazǵan edik.
