Tárkilengen telefondar kóp: SQO-da 120-dan astam múlik satylǵan
PETROPAVL. KAZINFORM — Soltústik Qazaqstan oblysynda byltyr respýblıkalyq menshik pen memleket kirisine ótken múlikterdi satý arqyly bıýdjetke 43 mln teńgeden astam qarajat tústi.
Soltústik Qazaqstan memlekettik múlik jáne jekeshelendirý departamentiniń málimetinshe, byltyr óńirde jekeshelendirý baǵdarlamasy aıasynda satylǵan nemese básekelestik ortaǵa berilgen memlekettik múlik nysandary tirkelmegen. Alaıda respýblıkalyq menshikke tıesili múlikti ótkizý jumystary jalǵasyp, 32 avtokólik satyldy. Bıýdjetke 28,6 mln teńge túsken.
Budan bólek, sot sheshimderi negizinde memleket menshigine ótken múlikter de satylymǵa shyǵarylǵan. Ótken jyly jalpy quny 14,8 mln teńgege 122 múlik ótkizilgen. Onyń ishinde 11 kólik quraly 12 mln teńgeden astam somaǵa satylsa, 76 uıaly telefonnan bıýdjetke 1,8 mln teńgeden astam qarjy túsken. Sondaı-aq toǵyz elektrondyq tehnıka men basqa da túrli múlikter satylǵan.
— Memlekettik múlikti tıimdi paıdalaný baǵytyndaǵy jumystar jalǵasady. Arnaıy júrgizilgen túgendeý barysynda SQO-daǵy 248 memlekettik uıymnyń jalpy aýdany 85 myń sharshy metrden asatyn nysany zertteldi. Nátıjesinde alty obektide jalpy kólemi 465,8 sharshy metr bolatyn artyq alań anyqtalyp, olar óteýsiz paıdalanýǵa berildi. Al tórt nysannyń 94 sharshy metr aýmaǵy jalǵa tapsyryldy, — deıdi departament basshysy Nurjan Islambekov.
Mamandardyń aıtýynsha, memlekettik aktıvterdi basqarýda tsıfrlandyrýǵa erekshe kóńil bólingen. Qazir barlyq negizgi rásimder «e-Qazyna» platformasy arqyly júzege asyrylady. Memlekettik múlikti jekeshelendirý, jalǵa berý, senimgerlik basqarýǵa tapsyrý, bir menshik túrinen ekinshisine berý jáne memleketke syıǵa tartý protsesteriniń barlyǵy elektrondy formatta júrgiziledi. Júıe arqyly habarlandyrý jarııalaý, ótinim qabyldaý, saýda-sattyq ótkizý jáne kelisimsharttarǵa qol qoıý tolyq avtomattandyrylǵan.
— Mundaı tsıfrlyq sheshimder memlekettik múlikti basqarýdaǵy ashyqtyqty arttyryp, azamattardyń saýda-sattyqqa qatysý múmkindigin keńeıtedi. Arnaıy elektrondyq saýda alańynda múlik týraly barlyq qajetti aqparat, baǵalaý qujattary men fotomaterıaldar ashyq ornalastyrylady, — deıdi Nurjan Islambekov.
Buǵan deıin 2020 jyldan beri memlekettik organdar men respýblıkalyq zańdy tulǵalardyń balansyndaǵy 3 500-den astam avtomobıl satylǵanyn jazǵan edik.
