Tarıhymyzǵa qatysty tyń málimetter sheteldik arhıvterde jatyr

ASTANA. QazAqparat - Qazaqqa qatysty tyń málimetter sheteldik arhıvterde jatyr. Bul týraly Elbasynyń «Uly dalanyń jeti qyry» atty maqalasyna oraı pikir bildirgen Memlekettik tarıh ınstıtýtynyń bas ǵylymı qyzmetkeri Ǵanı Qarasaev aıtty, dep habarlaıdy QazAqparat tilshisi.

«Qazaqstandaǵy barlyq arhıvti qarap shyqtyq, onda aıtarlyqtaı derek joq. Úlken málimetter Reseıdiń Sankt-Peterbor, Máskeý, Omby jáne shetel arhıvterinde jatyr. Biraq, olar jabyq, barsańyz bermeıdi. Olarda qazaqtyń otarshylyq zardabyn tartqany jóninde derekter mol. Sankt-Peterbor arhıvinde úsh aı jumys istep, biraz málimet ákeldim. Alaıda, onda ımperatorlyq degen bólim bar, óte qupııa. Oǵan kirgizbeıdi. Sondaǵy málimetterdi alýymyz kerek», - deıdi tarıhshy.

Onyń aıtýynsha, Túrkııa muraǵattarynda qazaqqa qatysty derekter tym az. Olar ózderinde bar Qazaq handyǵy men Osman ımperııasy  arasyndaǵy baılanystarǵa qatysty arhıv qujattaryn Qazaqstan tarapyna bergen.

«Al qytaı arhıvterinde ǵun, saq, úısin, qańly, Túrki qaǵanaty týraly málimetter óte kóp. Ony alý úshin kelisim kerek, sondaı-aq til bilýimiz qajet.  Elbasymyzdyń «Arhıv-2025» jobasy aıasynda osy málimetterdi tez arada alǵanymyz jón. Osyǵan jumyla kirisip, asyra maqtaı bermeı shyndyqty jazýymyz kerek. Sonda qazaq halqynyń álemdik orny aıqyndala túsedi dep oılaımyn», - dedi ǵalym.