Tarıhty burynǵysha zertteý ádistemesinen shyqpaı júrgen ǵalymdar kóp - Búrkitbaı Aıaǵan
ASTANA. QazAqparat - Qazaqstan Prezıdenti Nursultan Nazarbaevtyń «Uly dalanyń jeti qyry» maqalasynyń mańyzy - burynǵy markstik-lenındik metodologııadan bas tartý bolyp otyr. Qazaqstan tarıhy jaıly osyndaı paıymdy belgili tarıhshy, Memleket tarıhy ınstıtýtynyń dırektory, professor Búrkitbaı Aıaǵan keltirdi, dep habarlaıdy QazAqparat tilshisi.
«Bizdiń búgingi konferentsııa - «Rýhanı jańǵyrý: tarıhı sanany qalyptastyrý» dep atalady. Al qarasha aıynda ózderińiz biletindeı, Prezıdenttiń «Uly dalanyń jeti qyry» maqalasy shyqqan kezde biz qatty qýandyq. Sebebi, ol maqalanyń bir keremet mańyzy - burynǵy markstik-lenındik metodologııadan bas tartý. Elbasy Qazaqstan tarıhyn zertteýdiń múlde jańa bir tujyrymdamasyn usynyp otyr. ıAǵnı, ol tujyrym boıynsha birinshiden qazaq dalasy - burynnan órkenıet dalasy. Ekinshi qaǵıda - osy dalada ómir súrgen burynǵy ımperııalardyń murageri - qazirgi qazaq halqy. Bul - metodologııaǵa jatady. Bul oılar biz úshin óte mańyzdy, sebebi áli de bolsa qoǵamda burynǵy zertteý metodologııasynan shyqpaı júrgen ǵalymdardyń kóp ekeni belgili», - dedi Búrkitbaı Aıaǵan Elbasy kitaphanasynda ótip jatqan halyqaralyq konferentsııa barysynda tilshilerge bergen suhbatynda.
Professordyń aıtýyna qaraǵanda, bizdiń daıyndaǵan kitaptarymyz - Elbasynyń aıtqan osy oılaryna saı kelip tur.
«Qazaqstan tarıhshylary sońǵy kezde bir úlken qozǵalysta. Árıne, anany kórmedi, mynany jazbady degen syn kóp. Biraq, shyn máninde tarıhshylar meniń oıymsha, kóp jumys atqaryp jatyr. Sonyń arasynda qandaı deseńizder, mektep jáne joǵary oqý oryndaryna jańa metodologııa boıynsha kitap, hrestomatııalar daıyndalǵan Olar burynǵy keńestik ıdeologııa emes, qazirgi zamanǵa saı, tarıhı negizdemelerge súıene jazylǵan. Máselen, buryn aıtylmaı kele jatqan Alash tarıhy, Qazaqstan dalasyndaǵy asharshylyqtyń sebepteri men saldary, keńes ımperııasynda bolǵan qazaq dalasynyń taǵdyry, táýelsizdik alǵan kezde bizdiń qandaı el bolyp shyqqanymyzdyń bári qamtylǵan», - deıdi professor.
Aıta ketsek, QR BǴM jáne Memleket tarıhy ınstıtýty QR Tuńǵysh Prezıdenti - Elbasy Qorymen birlesip, «Rýhanı jańǵyrý: tarıhı sanany qalyptastyrý» taqyrybynda halyqaralyq ǵylymı konferentsııa uıymdastyryp jatyr. Konferentsııa jumysyna Ázerbaıjan, AQSh, QHR, Qyrǵyz Respýblıkasy, Ózbekstan, Tájikstan, Túrkııa, Ýkraına elderiniń halyqaralyq ǵylymı sarapshylary, tanymal qoǵam jáne memleket qaıratkerleri, ǵylymı-zertteý ınstıtýttarynyń ǵalymdary qatysýda.
Konferentsııa barysynda «The history of Kazakhstan», «Qazaqstan dıplomatııasy», «Gorızonty natsıonalnoı ıstorıı», «Qazaqstan tarıhy», «Ábilqaıyr Shaıban», «Qazaqstandaǵy kóshi-qon jáne demografııalyq ahýal» kitaptary tanystyryldy.
