«Tarıhty jeńimpazdar jazady» degen qaǵıdattyń ǵylymǵa qarsy sıpatyn umytpaǵan jón – Memleket basshysy
ASTANA. KAZINFORM – «Tarıhty jeńimpazdar jazady» degen qaǵıdattyń ǵylymǵa qarsy sıpatyn umytpaǵan jón. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
- «Tarıhty jeńimpazdar jazady» degen qaǵıdattyń ǵylymǵa qarsy sıpatyn umytpaǵan jón. ıAǵnı jeńimpazdardy jazǵyrýǵa bolmaıdy, álem tarıhynyń tórinen oryn alyp, zertteýshilerdiń maqtaý-madaǵyna ıe bolady. Al shaǵyn jáne orta memleketter, sonyń ishinde maıdanda jeńilis tapqan elder tarıhtyń tasasynda qalady. Qazaqstanda saıasattyń paıdasy úshin kóshpeli halyqtardy jabaıy, beı-bereket, tarıh sheńberinen tys kúsh retinde kórsetip, qýatty dala ımperııalaryn «memleket deńgeıine jete almaǵan» dep tómendetetin eski dogmalar men qasań kózqarastardy qaıta qaraý úderisi bastalyp ketti. Bul rette biz shynaıy tarıhnamany qalpyna keltire otyryp, ótkendi ásireleýden aýlaqpyz, - dedi Memleket basshysy.
Prezıdent tarıh ózine tánti bolǵan jalǵan áreketterdi, ortaq murany jekelegen halyqtyń qanjyǵasyna baılap berýdi keshirmeıtindigin basa aıtty.
- Kereǵarlyqtar men kedergilerge toly baı tarıhymyzdy birjaqty túsindirýge qoıylatyn talap ǵylymnyń quldyraýyna jáne ózara senimniń joǵalýyna ákeletin tuıyqqa tireıdi. Sonymen qatar kásibı tarıhshylar qaýymdastyǵynda «jumsaq kúsh» pen ǵylymı dıplomatııanyń ókilderi de bar. Olar saıasatkerler qamal turǵyzatyn jerde kópir salýǵa qabiletti. Tarıhshylardyń mıssııasy qazirgi almaǵaıyp kezeńde mańyzdy bolyp tur, - dedi Qasym-Jomart Toqaev.
Prezıdent Altyn Orda sol kezeńdegi kóptegen memleketterge qaraǵanda óz damýynda strategııalyq ashyqtyq qaǵıdatyna berik bolǵanyna nazar aýdartty.
