Tarıhty taspalaǵan 30 jyl: Kókshetaýda Prezıdent Teleradıokesheniniń úzdik fılmderi kórsetildi
ASTANA. KAZINFORM — Aqmola oblysynda «Hronıkadan bolashaqqa» aýqymdy aǵartýshylyq jobasy aıasynda Prezıdent Teleradıokesheniniń jeke prodakshn-bazasy — Derekti kıno ortalyǵy túsirgen fılmderdiń kórsetilimi ótti, dep jazdy Kazinform agenttiginiń tilshisi.
Derekti kıno belgili bir oqıǵany ǵana emes, tutas dáýirdiń tynysyn, ýaqyttyń kóńil kúıin de hatqa túsire alady. Prezıdent Teleradıokesheniniń 30 jyldyǵyna arnalǵan respýblıkalyq kınolektorııi kórermenderge adam, tabıǵat, mańyzdy oqıǵalar men búgingi tańda el bolashaǵyn aıqyndaıtyn úderister týraly avtorlyq derekti fılmdermen tanystyrady. Oblys ortalyǵynyń turǵyndary «Jolbarys: taıgadan dalaǵa», «Travel Kazakhstan», «ARAL» jáne «Qulandy aralynan shyqqan adam» fılmderin tamashalady.
— Búgingi kún Aqmola oblysynyń jurtshylyǵy úshin aıryqsha mańyzǵa ıe. Biz bul derekti kıno merekesiniń estafetasyn Qaraǵandy oblysynan úlken qýanyshpen qabyl alyp otyrmyz. Bul — qazaqstandyq qoǵamnyń qazirgi ómirine arnalǵan Prezıdent Teleradıokesheniniń úzdik týyndylarymen tanysýǵa berilgen tamasha múmkindik, — dedi Aqmola oblysy ákiminiń orynbasary Dosulan Aıtbaev.
Eger «Travel Kazakhstan» derekti fılmi elimizdiń týrıstik áleýeti men onyń múmkindikteri týraly baıandaıtyn bolsa, «Jolbarys: taıgadan dalaǵa» kartınasy týran jolbarysyn Qazaqstanǵa qaıta ákelý tarıhyn arqaý etedi.
2026 jylǵy mamyrda Reseı Prezıdenti Vladımır Pýtınniń Astanaǵa memlekettik sapary barysynda elimizge tosyn syı jasaldy — Qıyr Shyǵys taıgasynan Іle-Balqash rezervatyna tórt amýr jolbarysy jetkizildi. Prezıdent Qasym-Jomart Toqaev Reseı kóshbasshysynyń bul syıyn sapardyń «erekshe bir kórigi» dep atady. Fılm ekologııalyq bastamanyń dıplomatııalyq hattama sheńberinen asyp, Qazaqstan men Reseı arasyndaǵy yntymaqtastyqtyń jańa deńgeıiniń sımvolyna aınalǵanyn kórsetedi.
Turan jolbarysy kezinde Ortalyq Azııa aýmaǵynda, sonyń ishinde Qazaqstanda da mekendegen. Alaıda ýaqyt óte kele bul janýar óńirden múldem joıylyp ketti. Sondyqtan qazirgi bastama janýarlardy jaı ǵana qonystandyrý emes, joǵalǵan ekojúıeniń bir bóligin qalpyna keltirýge jasalǵan talpynys retinde qarastyrylady.
— Fılm ekojúıeniń qanshalyqty názik ekenin túsindiredi. Jolbarysty qaıtarý — jaı ǵana janýardy ákelý emes. Onyń tabıǵı ortasyn, qorek bazasyn qalpyna keltirip, ózdiginen ómir súre alatyndaı jaǵdaı jasaý qajet, — dedi fılmdi tamashalaǵan kókshetaýlyq Gúlbarshyn Salyq.
Mádına Múbarak kezinde Qazaqstan aýmaǵyn mekendegen osy bir aıbarly janýarǵa qatysty tarıhqa qyzyǵady.
— Bul — Qazaqstannyń bolashaǵyna salynǵan strategııalyq ınvestıtsııa. Bul baǵdarlama joǵalǵan tabıǵı murany qalpyna keltirý jáne ulttyq biregeılikti nyǵaıtýǵa baǵyttalǵan uzaq merzimdi memlekettik saıasatty kórsetedi. Prezıdent Qasym-Jomart Toqaevtyń tabıǵatty jáne tarıhı jadyny saqtaýǵa degen qamqorlyǵy elimizdiń ekojúıesin damytýǵa keshendi kózqaras qalyptasqanyn ańǵartady. Amýr jolbarystary Qazaqstanǵa dalanyń kúshi men aıbatynyń sımvolyn qaıtaratyn jańa popýlıatsııanyń negizine aınalýy múmkin. Sonymen qatar bul — qoǵamymyzdyń óz resýrstary men tarıhyna degen kózqarasynyń kemeldengeniniń kórsetkishi, — dep atap ótti Madına Múbarak.
«Hronıkadan bolashaqqa» kınolektorııi kórermenge Qazaqstanǵa tek resmı datalar men statıstıka arqyly ǵana emes, adamdardyń taǵdyry, tabıǵat jáne eldiń búginin qalyptastyratyn oqıǵalar arqyly qaraýǵa múmkindik beredi. Fılm avtorlary «biz tabıǵatty saqtap qala alamyz ba, joǵalǵan dúnıeni qaıta qalpyna keltire alamyz ba, adamdardy tabıǵı apat saldarynan qorǵaı alamyz ba, ulttyq murany saqtap, el tarıhy men oǵan degen jaýapkershilikti keıingi urpaqqa jetkize alamyz ba» degen ózekti máselelerdi kóteredi.
— Otyz jyl boıy Prezıdent Teleradıokesheniniń ujymy saparlar, kezdesýler men túrli is-sharalardy aqparattyq turǵyda súıemeldep, olardy el tarıhynyń jylnamasyna engen derekti fılmderge aınaldyryp keledi. Ýaqyt óte kele qyzmet aýqymy keńeıip, hronıkalyq materıaldarmen qatar mádenı jáne áleýmettik taqyryptardy qamtıtyn shyǵarmashylyq jobalar da qolǵa alyndy. Búginde biz Kókshetaý qalasynda ózimiz maqtan tutatyn tórt shyǵarmashylyq jobamyzdy usynyp otyrmyz. «Qulandy aralynan shyqqan adam» jáne «Aral» fılmderi Qazaqstannyń atyn Amerıka, Italııa, Anglııa jáne Reseıde ótken kóptegen halyqaralyq kınofestıvalderde tanystyrdy, — dedi Derekti kıno ortalyǵynyń redaktory ári stsenarıı avtory Madına Arǵyn.
Aıta keteıik, QR Prezıdent Teleradıokesheniniń «Hronıkadan bolashaqqa» respýblıkalyq kınolektorııiniń ashylýy 2026 jylǵy 21 mamyrda Astanada ótti. Joba Qazaqstannyń 20 qalasyn qamtýdy kózdeıdi. Kórsetilimder buǵan deıin Astana, Qyzylorda, Túrkistan, Shymkent, Taraz, Aqtaý, Atyraý, Oral, Aqtóbe, Óskemen, Semeı, Pavlodar, Petropavl, Jezqazǵan jáne Qaraǵandy qalalarynda ótti.
Kókshetaýdan keıin kınolektorıı Qostanaıǵa, odan ári Taldyqorǵan men Qonaevqa attanady. Qorytyndy kórsetilim 25 qyrkúıekte Almatyda ótedi. Fılm kórsetilimderi óńir ákimdikteriniń qoldaýymen uıymdastyrylyp otyr.
