Tarıhtan tartys quralyn jasaýǵa bolmaıdy — Memleket basshysy
ASTANA. KAZINFORM — Tarıhtan tartys quralyn jasaýǵa bolmaıdy. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Tarıh halyqtardyń arasyn jalǵaıtyn altyn kópir retinde ádiletti ári qaýipsiz álem qurýǵa yqpal etýi qajet. Sol úshin ortaq múdde jolynda kúsh biriktirip, birlese áreket etýimiz qajet. Bul máselede ǵylymı qaýymdastyq aıryqsha ról atqaratyny anyq. Búgingi jıynda aıtylatyn salmaqty oılar men utymdy usynystar jańa ǵylymı eńbekterge, halyqaralyq jobalar men ekspedıtsııalarǵa negiz bolatyny sózsiz, — dedi Qasym-Jomart Toqaev.
Prezıdenttiń aıtýynsha, bul sımpozıýmdy turaqty túrde ótkizý josparlanyp otyr.
— Sizder aldaǵy ýaqytta da osy mańyzdy jumysqa mol úles qosa beresizder dep oılaımyn. Barshańyzǵa taǵy da zor alǵys aıtamyn. Shyn máninde, búgingi sımpozıýmnyń tarıhı máni aıryqsha. Osy mańyzdy jıynnyń qorytyndysy boıynsha arnaıy qarar qabyldanady. Bul qujat Altyn Ordanyń tarıhy men murasyn zertteý jumysyna tyń serpin beredi dep senemin, — dedi Memleket basshysy.
Prezıdent Altyn Orda sol kezeńdegi kóptegen memleketke qaraǵanda óz damýynda strategııalyq ashyqtyq qaǵıdatyna berik bolǵanyna nazar aýdartty.
