Tarıhtaǵy eń qymbat Olımpıada medaliniń sapasy synǵa ushyrady

MILAN. KAZINFORM — Italııanyń Mılan jáne Kortına-d’Ampetstso qalalarynda ótip jatqan XXV qysqy Olımpıada oıyndarynyń medaldary sapa jaǵynan synǵa ushyrady.

BBC-diń habarlaýynsha, Olımpıada júldegerleri medal baýlarynyń úzilip qalǵanyn, tipti keıbiriniń ekige bólingenin aıtyp shaǵymdanýda.

Bul másele týraly alǵash bolyp amerıkalyq shańǵyshy Brızı Djonson málimdedi. Ol altyn medal jeńip alǵannan keıin qýanyshtan sekirgen sátte medal baýy úzilip, jerge túsken.

Sportshy baspasóz máslıhatynda tilshilerge zaqymdanǵan Olımpıada júldesin kórsetip, «ony taǵyp eshqashan sekirmeńiz» dep ázil aralas eskertý jasady.

Osyǵan uqsas jaǵdaılar basqa sportshylardyń da basynan ótken. Atap aıtqanda, shvetsııalyq shańǵyshy Ebba Anderssonnyń kúmis medali de baýynan úzilip, ekige bólinip qalǵan.

Qysqy Olımpıada oıyndarynyń bas operatsııalyq dırektory Andrea Frensıs uıymdastyrý komıteti bul máselege baılanysty tekserý jumystaryn bastaǵanyn málimdedi.

Aıta keteıik, bıylǵy qysqy Olımpıada oıyndaryndaǵy altyn medaldar 500 gramm kúmisten jasalyp, ústine 6 gramm taza altyn jalatylǵan. Kúmis medaldar 500 gramm taza kúmisten, al qola medaldar taza mystan quıylǵan.

Qazirgi altyn baǵasyn eskersek, Mılan qysqy Olımpıadasynyń altyn medaliniń quny shamamen 2481 AQSh dollaryn quraıdy. Bul aldyńǵy Olımpıada oıyndarymen salystyrǵanda áldeqaıda joǵary jáne Parıj Olımpıadasyndaǵy altyn medal baǵasynan eki ese qymbat.

Kúmis medaldiń quny shamamen 1400 AQSh dollaryna baǵalanyp otyr. Bul kórsetkish te Parıj Olımpıadasymen salystyrǵanda úsh ese joǵary.

Eske salaıyq, buǵan deıin sportshylar Parıj Olımpıadasy medaldarynyń sapasyna da shaǵymdanǵan bolatyn.