Tarıhtaǵy eń dúleı daýyl: «Melıssa» daýylynan ıAmaıkada adam shyǵyny tirkeldi

ASTANA. KAZINFORM — «Melıssa» jyldamdyǵy saǵatyna 140 mılge (shamamen 225 shaqyrym) jetetin tórtinshi sanattaǵy daýylǵa deıin kúsheıdi. Sarapshylardyń boljaýynsha, ol ıAmaıkada buryn-sońdy tirkelgen eń kúshti daýyl bolýy múmkin, dep habarlaıdy NBC News.

Derekkóz málimetinshe, qazirgi ýaqytta keminde tórt adamnyń qaza tapqany rastaldy. Meteorologtar ıAmaıka, Gaıtı jáne Domınıkan Respýblıkasy aýmaǵynda apatqa alyp keler sý tasqyny men laı kóshkinderi bolýy múmkin ekenin eskertti.

Sınoptıkterdiń habarlaýynsha, dúısenbi nemese seısenbi kúni daýyl ıAmaıkadan ótip, odan ári Kýba baǵytynda jyljýy yqtımal. Aldaǵy 48 saǵatta «Melıssa» besinshi sanattaǵy daýylǵa deıin kúsheıip, jeldiń jyldamdyǵy saǵatyna 157 mılge jetýi múmkin.

ıAmaıka bıligi tótenshe jaǵdaı qyzmetterin tolyqtaı jumyldyrdy. Araldaǵy barlyq áýejaıdyń jumysy ýaqytsha toqtatyldy. Úkimet turǵyndardy asa saq bolýǵa jáne daýyl kezinde kóshege shyqpaýǵa shaqyrdy.

Daýyl saldarynan Domınıkan Respýblıkasynda 500 myńnan astam adam aýyzsýsyz qaldy. Buǵan qulaǵan aǵashtar men zaqymdanǵan ınfraqurylym sebep bolǵan.

Gaıtı men Domınıkan Respýblıkasynda adam shyǵyny men evakýatsııa jaǵdaılary tirkeldi. Al Kýbanyń shyǵys jaǵalaýynan 145 myńnan astam turǵyn qaýipsiz aımaqtarǵa kóshirildi. Sondaı-aq Gýantanamo-Beı áskerı bazasyndaǵy personaldy evakýatsııalaýǵa daıyndyq sharalary qolǵa alyndy.

Eske sala keteıik, Fılıppındegi dúleı daýyldan 8 adam qaza tapqan edi. Al Ispanııada «Alısa» daýylynyń saldarynan ondaǵan úı sý astynda qaldy. 

Sondaı-aq jýyrda Batys Eýropaǵa «meteobomba» qaýpi tónip kele jatqanyn jazǵanbyz.