Tarıhta tuńǵysh ret Interpol prezıdenti bolyp áıel saılandy
ASTANA. 9 qarasha. QazAqparat - Halyqaralyq qylmystyq polıtsııa uıymynyń (Interpoldyń) jańa prezıdenti bolyp frantsýz áıeli Mıreı Balestrazzı saılandy, dep habarlandy uıymnyń baspasóz qyzmetinen.
«Frantsııa týmasy Mıreı Balestrazzı Interpol prezıdenti bolyp saılanǵan alǵashqy áıel bolyp otyr», - delingen uıymnyń Twitter-degi resmı paraqshasynda.
Buǵan deıin 58 jastaǵy Balestrazzı Eýropa boıynsha Interpol atqarýshy komıtetiniń vıtse-prezıdenti laýazymynda boldy. 1975 jyldan bastap frantsýz polıtsııasynyń komıssary bolyp qyzmet etti, al 1990 jyldary frantsýzdyq Korsıkada qylmystyq polıtsııany basqardy.
Frantsııanyń ishki ister mınıstri Manıýel Valstiń sózine qaraǵanda, «ol frantsýz polıtsııasy maqtan tutatyn áıelderdiń biri».
