Tarıhta alǵash ret: Túrkistan oblysynda qaıtys bolǵan 18 jastaǵy jigittiń aǵzasy 4 naýqasqa salynady
TÚRKІSTAN. KAZINFORM - Túrkistan oblysynda alǵash ret máıittik donorǵa ota jasaldy. Qaıtys bolǵan jigittiń aǵzasy Shymkent, Astana, Almaty qalasyndaǵy 4 naýqasqa bólip berilmek.
Oblystyq klınıkalyq aýrýhanasynyń dárigerleri jol apatynan keıin medıtsınalyq mekemege aýyr halde jetkizilip, qaıtys bolǵan 18 jastaǵy jigittiń aǵzasyn tórt naýqasqa hırýrgııalyq jolmen bólip berdi.
Dárigerlerdiń sózinshe, aǵzany alýǵa arnaıy jasaqtalǵan eki brıgada Almaty men Astana qalasynan ushyp keldi. Máıitten alynǵan baýyr, eki búırek pen júrek jáne ókpe tizim boıynsha transplantatsııa otasy qajet naýqastarǵa hırýgııalyq jolmen salynady.
Máıittik donordyń aǵzasyn alýǵa týystary zańdy túrde ruqsat bergen. Respýblıkalyq transplanttaý ortalyǵynyń Túrkistan oblysy boıynsha óńirlik úılestirýshisi Ámirhan Sandybaevtyń aıtýynsha, bul – óńirdegi tarıhı oqıǵa.
«Túrkistan oblysy boıynsha máıitten aǵza alý otasy tarıhta alǵash ret ótip jatyr. Bir búırek oblystyq klınıkalyq aýrýhanada qalady. Júregi Shymkenttegi júrek ortalyǵyna jiberiledi. Bir búıregi Almatyǵa, ókpesi Astana qalasyna jiberiledi», - dedi Ámirhan Sandybaev.
