Tarıhshynyń mindeti - ulttyq tarıhty qaıdaǵy bir ámbebap zańdylyqtardyń qasań qalyptaryna salyp jibermeı, ulttyq tarıhtyń jandy, bólekshe aǵzasynyń qalaı damıtynyn túsiný - M.Tájın

ASTANA. 5 maýsym. QazAqparat - Tarıhshynyń mindeti - ulttyq tarıhty qaıdaǵy bir ámbebap zańdylyqtardyń qasań qalyptaryna salyp jibermeı, ulttyq tarıhtyń jandy, bólekshe aǵzasynyń qalaı damıtynyn túsiný. Mundaı pikirdi búgin elordadaǵy L.Gýmılev atyndaǵy Eýrazııa ulttyq ýnıversıtetinde ótip jatqan Qazaqstan Respýblıkasynyń ulttyq tarıhyn zertteý jónindegi vedomstvoaralyq jumys tobynyń keńeıtilgen otyrysynda QR Memlekettik hatshysy Marat Tájın málim etti.

«Ǵalymnyń róli ózgerdi. Tarıh ǵylymyna fenomenologııa men germenevtıka ádisteriniń enýi tarıhı zertteýlerdiń sıpatynyń ózin edáýir ózgertip jiberdi. Endigi jerde tarıhshy faktilerdi tizbelep, sýrettep otyrýshy, oqıǵalardy tek «tirkeýshi» emes. Endigi jerde tarıhshy «paıymdaýshyǵa» - zertteletin ýaqyttyń ishki maǵynasyna oı jiberetin ǵalymǵa, faktilerdi jaı zerttep qana qoımaıtyn, naqty qoǵamnyń qundylyqtaryn, jón-josyqtaryn, moralin «túsinýge» qol jetkizetin ǵalymǵa aınalýǵa tıis»,- dedi ol.

Memlekettik hatshynyń paıymynsha, osylaı qaraǵan kezde árbir ulttyq tarıh formatsııalar men órkenıetterdiń abstraktili hronologııalyq jylnamasy retinde emes, halyqtyń búkil kúrdeliligi men bólek bitimin boıyna syıǵyzǵan jandy tarıh retinde boı kórsetedi. Tarıhshynyń mindeti - ulttyq tarıhty qaıdaǵy bir ámbebap zańdylyqtardyń qasań qalyptaryna salyp jibermeı, ulttyq tarıhtyń jandy, bólekshe aǵzasynyń qalaı damıtynyn túsiný.

«Eýropatsentrızmmen ábden ýlanǵan sheteldik kópesterdiń, barlaýshylardyń, áskerı adamdardyń nemese geograftardyń qazaq tarıhy týraly kýágerlikterin synı taldaýsyz sózsiz aqıqat dep qaraýǵa bola ma? Biz ol derekkózderdiń bárin baıypty túrde qaıta paıymdaýǵa, búgingi ǵylymnyń bıiginen qaraǵanda olardyń kóbine-kóp qazirgi úlgi-qalyptar boıynsha eshqandaı syn kótermeıtinin túsinýge tıispiz»,- dedi M.Tájın.