Tarıhshy-professor XV ǵasyrda jasalǵan kartanyń kóshirmesin Túrkistan mýzeıine syılady
TÚRKІSTAN. QazAqparat - Túrkistan qalasyn damytý jónindegi alqaly jıynda erekshe oqıǵa boldy. Tarıh ǵylymdarynyń doktory, professor Hankeldi Ábjanov Túrkistan oblysynyń ákimi Janseıit Túımebaevqa Uly Jibek Jolynyń kartasyn saltanatty túrde tapsyrdy, dep habarlaıdy QazAqparat oblys ákiminiń baspasóz qyzmetine silteme jasap.
Bul qujat XV ǵasyrda jasalǵan. Kartanyń tarıhy týraly H.Ábjanov bylaı deıdi:
«Osydan 4-5 jyl buryn Almatydaǵy ǵylym akademııasynda tarıhqa qatysty úlken jıyn ótti. Oǵan Qytaıdaǵy Beıjiń ýnıversıtetiniń professory Lın Meıtsýn de qatysty. Bizdiń tarıhymyzdy tyńdap, arnaıy shaqyrǵanymyzǵa rıza bolǵan ol sonaý XV ǵasyrda basylǵan kartanyń kóshirmesin syıǵa tartty. Álemde bul kartanyń kóshirmeleri bir qoldyń saýsaǵynyń sanyna da jetpeıdi. Al, túpnusqasy Gonkong bankinde saqtaýly tur. Onyń quny - 20 mıllıon AQSh dollary. Qytaı professory ózindegi eki kóshirmeniń bireýin bizge syılady. Kartada Uly Jibek Jolynyń boıyndaǵy iri qalalar men ózender belgilengen. Іshinde Túrkistan qalasy da bar. Bolashaqta Túrkistan oblysynyń ortalyǵy - Túrkistanda úlken mýzeı salynatynyn estidim. Sondyqtan osy asa qundy jádigerdi Túrkistandaǵy mýzeıge tapsyrýdy jón dep taptym».
Qundy jádigerdi qabyldap alǵan Túrkistan oblysynyń ákimi Janseıit Túımebaev:
«Bul karta murajaıymyzdyń tórinde turady. Túrkistan qalasy týraly jádigerler men arheologııalyq baılyqtar bolsa bizge ákelip tapsyryńyzdar. Murajaıǵa qoıaıyq. El kórsin. Tarıhymen tanyssyn», - dep, professorǵa rızashylyǵyn bildirdi.
Hankeldi Ábjanovtyń aıtýynsha, qytaı professory Lın Meıtsýn álgi karta týraly arnaıy eńbek jazǵan.
«Belgili tarıhshy, professor Nurlan Kenjeahmet te osy kartany tereń zerttep, kitap jazyp qoıdy. Óıtkeni, ol túrki tilindegi jer-sý attaryn jaqsy biledi. Solardy atap kórsete bildi. Áttegen-aıy, qundy eńbegin baspadan shyǵara almaı júr. Qazir qoljazba kúıinde tur», - dep, mańyzdy máseleni aıtty.
Oblys ákimi Janseıit Túımebaev kitapty jaryqqa shyǵarýǵa qoldaý kórsetýge ýáde berip, professordy qabyldaýǵa árqashan daıyn ekenin jetkizdi.
