Tarıhshy ǵalymdar Qazaqstanda antropolog mamandardyń azaıýyna alańdaýly
ASTANA. 6 maýsym. QazAqparat - Qazaqstanda kópten beri antropolog mamandardy daıarlaý jumysy júrgizilmeıdi.
Bul týraly keshe Astanada ótken Qazaqstannyń ulttyq tarıhyn zerdeleý jónindegi vedomstvoaralyq jumys tobynyń keńeıtilgen otyrysynda (Jalpyulttyq keńes) Shoqan Ýálıhanov atyndaǵy tarıh jáne etnologııa ınstıtýtynyń dırektory, professor Hangeldi Ábjanov osylaı málim etti.
«Ondaı mamandar bolmasa, biz ejelgi zaman keıipkerleriniń antropologııalyq kelbetin qalaı jasaımyz? Qazirgi kezde tarıh salasy boıynsha antropologtardy oqytý júıesi bıologııa nemese medıtsınanyń bilim berý baǵdarlamalarymen tyǵyz baılanysty bolyp tur. Bakalavr bilimi bar ondaı antropologtar tarıh fakýltetteriniń magıstratýrasyna qabyldanbaıdy. Sebebi oqýǵa qabyldaý erejelerine qaıshy. Sonyń saldarynan tarıh ǵylymynyń asa mańyzdy salasy - Qazaqstandaǵy antropologııa joıylyp barady», - deıdi H.Ábjanov.
Aıta keteıik, búginde kásibı antropologtardyń joqtyǵy saldarynan kezinde Altyn ordanyń mádenı ortalyǵy bolǵan Saraıshyq sııaqty ejelgi shahar tolyǵymen zerttelmeı qaldy. Ol jerde adam qańqalary shashylyp jatyr. Balalar emin-erkin oınap, tarıhı jádigerlerdi kelip-ketip júrgen týrısterge tıyn-tebenge aıyrbastaýda. Jaıyqtyń boıynda ornalasqan Saraıshyqty ózen sýy shaıyp barady.
