Tarıhqa qatysty jalǵan aqparatqa jedel jaýap beretin tıimdi tetik qalyptastyrý kerek – depýtat

- Memleket basshysy Quryltaı sessııasynyń ashylýynda ulttyq sana-sezimdi qalyptastyrýǵa erekshe mán berýdi atap: «Ulttyń jadyn kúmándi derekpen, burmalanǵan málimetpen ýlaýǵa bolmaıdy. Mundaı áreket ótken kúnge degen senimdi, keleshekke degen úmitti álsiretedi», – dedi. Bul – ulttyq tarıhı sanany qalyptastyrýǵa memlekettik deńgeıde júıeli kózqaras qajet ekenin kórsetedi. «Ádilet» saıası partııasynyń ustanymy – ádildik ulttyq sana men bolmystyń negizgi qaǵıdasynyń biri bolýy tıis. Al ádildik tarıhı shyndyqqa obektıvti kózqarastan bastalady, - dedi depýtat.

Onyń aıtýynsha, búginde tarıhı sana tek oqýlyq pen ǵylymı eńbekter arqyly qalyptaspaıdy. Áleýmettik jeli men tsıfrlyq platformanyń yqpaly artyp keledi. Ásirese jastar TikTok, Instagram, YouTube sııaqty platformalardan aqparatty kóp alady. Sondyqtan Qazaqstan tarıhy týraly qandaı aqparat taraıdy, onyń derekkózi qandaı jáne ol qoǵamǵa qalaı jetkiziledi degen suraqtyń mańyzy artyp keledi.

- Ókinishke oraı, áleýmettik jelilerde tarıhı taqyryptaǵy kúmándi jáne burmalanǵan aqparat tez taralady. Oǵan der kezinde kásibı jaýap berip, naqty derek usynatyn júıeli tetik qajet. Bul másele tarıhpen ǵana shektelmeıdi. Halyqpen kezdesýler kezinde elde atqarylyp jatqan kóptegen mańyzdy jumystardy azamattardyń tolyq bile bermeıtinine kóz jetkizdik.

Másele jumystyń joqtyǵynda emes. Másele – onyń máni men nátıjesin halyqqa túsinikti tilde jetkizýde. Sondyqtan aqparatty jaı jarııalaý jetkiliksiz. Ony túsindirý de mańyzdy. Azamatqa reformanyń maqsatyn, onyń nátıjesin jáne qoǵamǵa áserin túsindiretin jýrnalıstıka qajet. Memlekettik aqparattyq saıasat ta osy baǵytqa basymdyq berýi kerek. Ol tek memlekettik bastamalardy jarııalaýmen shektelmeýi tıis, - dedi ol.

Quryltaı depýtaty aqparattyq saıasat tarıhı sanany qalyptastyrýǵa, ulttyq qundylyqty dáripteýge jáne eldegi ózgeristi durys túsindirýge qyzmet etýi qajettigine nazar aýdartty.

- Bul ásirese jastar úshin mańyzdy. Óıtkeni búgingi aqparat erteńgi qoǵamdyq kózqarasqa áser etedi. Sondyqtan aqparattyq keńistiktegi báseke – ulttyq sanaǵa yqpal etetin báseke, - dedi Sholpan Karınova.

Osyǵan oraı Quryltaı depýtaty Úkimetke mynadaı usynystar berdi:

- Ulttyq tarıhı sanany memlekettik aqparattyq saıasattyń basym baǵytynyń biri retinde aıqyndaý;

- Qazaqstan tarıhyna qatysty kontenttiń ǵylymı negizdiligi men derektiligin qamtamasyz etetin júıe qalyptastyrý;

- Tarıhı jad pen ulttyq qundylyqtardy dáripteıtin zamanaýı medıa-jobalardy qoldaý;

- TikTok, Instagram, YouTube sııaqty platformalarda Qazaqstan tarıhyn zamanaýı ári túsinikti formatta nasıhattaıtyn jobalardy iske asyrý;

- Tarıhqa qatysty jalǵan jáne burmalanǵan aqparatqa jedel jaýap beretin tıimdi tetik qalyptastyrý.

Aıta keteıik, búgin Quryltaı otyrysynda «Qazaqstan men Serbııa Úkimetteri arasyndaǵy áskerı-tehnıkalyq yntymaqtastyq týraly kelisimdi ratıfıkatsııalaý týraly» zań jobasy birinshi oqylymda maquldandy.