Tarıhı júlde: Qazaqstan quramasy shahmat olımpıadasynyń kúmis júldegeri
ASTANA. KAZINFORM – Shahmattan Qazaqstan áıelder quramasy Majarstan astanasy Býdapeshte ótip jatqan 45-shi Olımpıadanyń kúmis júldegeri atandy.
Bizdiń komanda sońǵy týrda AQSh-pen 2-2 esebimen teń túsip, 18 upaı jınady. Al Olımpıadanyń favorıti Úndistan áıelder men erler arasyndaǵy jarysta altynnan alqa taqty.
Áıelder quramasynda Bıbisara Asaýbaeva, Merýert Kamalıdenova, Ámına Qaıyrbekova, Ksenııa Balabaeva, Alýa Nurman synǵa tústi. Olımpıadada 1-2 oryn alǵan oıynshylarǵa Eńbek sińirgen sport sheberi ataǵy beriledi.
Búkilálemdik shahmat Olımpıadasy 2 jylda bir ótedi. Osyǵan deıingi dodany Úndistannyń Chennaı qalasy qabyldaǵan. Sol kezde Qazaqstan áıelder komandasy (Bıbisara Asaýbaeva, Jansaıa Ábdimálik, Gúlishan Nahbaeva, Ksenııa Balabaeva, Nazerke Nurǵalı) 352 upaımen úzdik bestikti túıindedi. Jansaıa Ábdimálik 1-taqta boıynsha qola júldeger atanǵan. Bul osyǵan deıingi eń úzdik kórsetkish bolǵan.
Statıstıka:
Áıelder quramasy 6-oryn (2014 jyly Norvegııa)
Áıelder quramasy 8-oryn (1996 jyly Armenııa)
Áıelder quramasy 11-oryn (1994 jyly Máskeý)
Áıelder quramasy 8-oryn (1992 jyly Fılıppın)
Anyqtama:
Olımpıada 9 raýndtan turatyn shveıtsarııalyq ashyq týrnır formatynda ótedi. Ýaqytty baqylaý 40 júris úshin 90 mınýt, sodan keıin oıynnyń qalǵan bóligine 30 mınýt beriledi. Bul kezde birinshi júristen keıin kelesisine 30 sekýnd beriledi.
Eske salsaq, Prezıdent Qasym-Jomart Toqaev shahmattan áıelder quramasyn jeńisimen quttyqtady.
