Tarıhı jeńis: Ózbekstan basshysy paralımpıadashylardy marapattady
TAShKENT. KAZINFORM – Ózbekstan prezıdenti Shavkat Mırzıeev XVII jazǵy Paralımpıada oıyndarynyń jeńimpazdary men júldegerlerin marapattady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ózbekstandyq sportshylar Parıjde ótken Paralımpıada oıyndarynda 26 medal jeńip alyp, tarıhı rekord ornatty.
«Sizder, bizdiń erjúrek ul-qyzdarymyz joǵary belesti baǵyndyryp, jarystyń naǵyz qaharmanyna aınaldyńyzdar. Ózbekstan komandasy 10 altyn, 9 kúmis, 7 qola medal jeńip aldy. Jalpy komandalyq esepte 13-orynǵa jaıǵassa, Azııada 3-oryn, túrki, ıslam jáne TMD elderi arasynda 1-orynǵa shyqty. Sportshylarǵa qajetti barlyq jaǵdaı jasaldy. Nátıjesinde bıyl Paralımpıada oıyndarynda 9 sport túrinen alǵash ret 65 sportshy el namysyn qorǵady», - dedi prezıdent.
Shavkat Mırzıeev bıyl tuńǵysh ret ózekbekstandyq velosportshylar Paralımpıadaǵa qatysqanyn atap ótti.
«Ózbekstannyń sport tarıhynda kóptegen jeńister bar ekeni belgili. Biraq Paralımpıada oıyndarynda mundaı rekordtyq jetistik eshqashan bolǵan emes. Mundaı jarqyn jeńis Ózbekstan jylnamasyna altyn áriptermen jazylady», - dep toqtaldy Ózbekstan basshysy.
Qosa ketsek, buǵan deıin Shavkat Mırzıeev Paralımpıada oıyndarynyń jeńimpazdary men júldegerlerin jáne olardyń bapkerlerin memlekettik nagradamen marapattaý týraly jarlyqqa qol qoıǵan edi.
