Tarıhı sheshim: Olımpıada oıyndarynyń árbir qatysýshysy HOK grantyn alady
ASTANA. KAZINFORM – Halyqaralyq Olımpıadalyq komıteti (HOK) sportshylardy qoldaýǵa arnalǵan jańa baǵdarlamanyń iske qosylǵanyn jarııalady. Endi tarıhta alǵash ret Olımpıada oıyndarynyń árbir qatysýshysy 10 000 AQSh dollary kólemindegi Fit for the Future Olympian Grant grantyn alýǵa úmitker bola alady. Bul týraly QR UOK jarııalady.
Bul sheshim Shveıtsarııanyń Lozanna qalasyndaǵy HOK-tyń 146-sessııasynda jarııalandy. Grantty alǵash bolyp 2026 jyly Italııanyń Mılan jáne Kortına-d’Ampetstso qalalarynda ótetin qysqy Olımpıada oıyndarynyń qatysýshylary alady.
Jańa bastama sportshylardyń mansabyn uzaq merzimdi damytýǵa jáne sporttyq jolyn aıaqtaǵannan keıingi beıimdelýine qoldaý kórsetýge baǵyttalǵan «Fit for the Future» strategııalyq baǵdarlamasy aıasyndaǵy alǵashqy jobalardyń biri boldy.
Fit for the Future Olympian Grant granty qazirgi qoldanystaǵy qoldaý baǵdarlamalaryn tolyqtyrady. Árbir olımpıadalyq tsıklde shamamen 14 myń sportshy Olımpıada oıyndaryna ár qatysqany úshin 10 myń AQSh dollary kólemindegi grantqa úmitker bola alady. Qarajat Ulttyq Olımpıadalyq komıtetterdiń qoldanystaǵy qurylymdary arqyly bólinedi. Eger sportshy grantqa ótinim bermese, oǵan bólingen qarajat qorda qalyp, bolashaq olımpıadashylardy qoldaýǵa jumsalady.
Sonymen qatar jańa baǵdarlama HOK-tyń Ulttyq Olımpıadalyq komıtetterge, halyqaralyq sport federatsııalaryna, Olımpıada oıyndarynyń uıymdastyrý komıtetterine jáne Olympic Solidarity baǵdarlamasy arqyly kórsetip otyrǵan qoldaýynyń kólemine áser etpeıdi.
Grantty 2026 jylǵy Olımpıada oıyndarynan bastap Aa sanatyndaǵy akkredıtatsııamen qatysqan barlyq sportshylar ala alady. Al jasóspirimderdiń Olımpıada oıyndarynyń qatysýshylary bul baǵdarlamaǵa kirmeıdi. Sondaı-aq sportshy dopıngke qarsy erejelerdi, HOK Ádep kodeksin, jarysqa qatysý talaptaryn nemese Olımpıadalyq hartııany buzbaǵan bolýy tıis.
– Bul grant árbir olımpıadashyǵa qoljetimdi bolady. Tek júldegerlerge nemese belgili bir eldiń sportshylaryna ǵana emes. Sebebi árbir atlettiń Olımpıadaǵa deıingi joly erekshe. Olımpıada arenasyna shyǵý úshin olardyń árqaısysy úlken qıyndyqtardan ótti, kóp nárseden bas tartty. Onyń artynda jyldar boıǵy eńbek, tabandylyq jáne armanǵa degen senim jatyr. Biz bul qarajattyń júlde úshin berilmeıtinin erekshe atap ótkimiz keledi. Bul – olımpıadashy ataný jolyndaǵy qajyrly eńbek pen jankeshtilikti moıyndaýdyń belgisi. Sondaı-aq bul osy joldy buǵan deıin júrip ótken sportshylarǵa degen qurmet, – dedi HOK Sportshylar komıssııasynyń tóraǵasy Paý Gazol.
Qazirgi ýaqytta HOK ótinim berý jáne granttardy tóleý tetigin ázirlep jatyr. Italııadaǵy Olımpıada oıyndarynyń qatysýshylary úshin ótinim qabyldaý osy jyldyń sońynda bastalady dep josparlanyp otyr. Al alǵashqy tólemder 2027 jyly júzege asyrylady.
Aıta keteıik, elimizde Olımpıada kúninde týǵan 1000-nan astam nárestege syılyq tabystaldy.
