Tarıhı serıaldar tórge ozǵan jyl
Qazaqstandyq «Mystan» serıaly Berlın festıvalinde úzdik drama atandy
Danııar Alshynov - Nıý-Iorkte ótken IMDb halyqaralyq baıqaýnda «Úzdik drama akteri».
The best actor award-New York - IMDb halyqaralyq konkýrsy búkil álemde erekshelengen akter arasynda ótetin jyl saıynǵy shara sanalady. Basty mıssııasy - talanttardy moıyndap, táýelsiz kınonyń úzdik akterlerin marapattaý. Jyl boıy tóreshiler tek úzdik fılmderdi Nıý-Iorktegi jyl saıynǵy kórsetilim úshin tańdap alady.
«Nomad Stunts» kaskaderler toby – AQSh-taǵy Álem kaskaderleri akademııasynyń «Taurus» syılyǵynyń ıegeri. («Tomırıs» fılmindegi trıýkteri úshin).
Top jetekshisi Jaıdarbek Kúnǵojınovtiń aıtýynsha, «kaskederler arasyndaǵy «Oskar» atalyp ketken syılyqty Qazaqstan Ortalyq Azııa elderi arasynda alǵashqy bolyp ıelengen. «Taurus» bul ujymǵa «Shetel fılmindegi eń úzdik trıýkter» nomınatsııasy boıynsha berilgen.
Samal Eslıamova – Reseı Federatsııasyndaǵy «Nıka» kınematografıster júldesiniń 2019 jylǵy eń úzdik aktrısasy. («Aıka» fılmindegi basty ról úshin).
2020 jyly marapattaý saltanaty pandemııaǵa baılanysty ótpegendikten, uıymdastyrýshylar 2019-2020 jylǵy jeńimpazdardy qatar marapattady. Eske salsaq, 2018 jyly Samal Eslıamova Kann kınofestıvalinde úzdik aktrısa atandy.
2021 jyly Samal Eslıamova basty róldi somdaǵan «Barymtashylar. Ýaqyt joly» fılmi Frantsııanyń 21 qalasynda prokatqa shyqty.
Erkebulan Daıyrov – Kann kıno júldesi boıynsha «Azııanyń úzdik akteri» («Kúnbaǵys» fılmindegi róli úshin).
Akter buǵan deıin «Baýyrjan Momyshuly», «Anaǵa aparar jol», «Qazaq eli», «Juldyzdar toǵysqanda», «Taraz», «Altyn orda», «Shlagbaým», «Balýan Sholaq» fılmderinde negizgi rólderdi somdaǵan.
Dárejan Ómirbaev - Tokıo halyqaralyq kınofestıvaliniń «Úzdik rejıseri». («Aqyn» fılmi úshin).
«Qazaqfılm» AQ túsirgen «Aqyn» fılmi Dıdar esimdi moıyndalmaǵan jazýshynyń ómiri týraly baıandaıdy. Fılmniń stsenarııi nemis jazýshysy German Gesseniń «Avtorlyq kesh» jelisi boıynshy jazylǵan.
Tólepbergen Baısaqalov - Dúnıejúzilik Azııa kınofestıvaliniń «Úzdik er adam róli» júldesiniń ıegeri («Ot» fılmindegi jumysy úshin).
Baıqaýǵa 20-dan astam elde túsirilgen 30 fılm qatysty. «Ot» fılmi búgingi qoǵamda ómir súrip júrgen qarapaıym adamnyń oqıǵasyn baıandaıdy.
Marjan Bekmaǵanbetova – Kann qalasynda ótken CANNES SHORTS qysqametrajdy fılmder festıvaliniń «Kórermender kózaıymy» nomınatsııasynyń jeńimpazy («Marııam» fılmi úshin).
Bas keıipker Marııamnyń rólinde sol kezde QazUÓÝ stýdenti bolǵan jas aktrısa Aıǵanym Ótegenova oınady. Batyr qyz Zereni somdaǵan – Ázel Qanatbek. Fılmge túrmeden týǵan aýylyna oralǵan jas qyz Marııamnyń ómiri arqaý bolǵan.
«Mystan» serıaly – halyqaralyq Webfest Berlin kınofestıvaliniń júldegeri.
«Mystan» vebserıalynyń tusaýy 2021 jylǵy 24 maýsymda kesilgen bolatyn. Telehıkaıa er adamdar tarapynan zorlyq-zombylyqqa ushyraǵan úsh áıeldiń taǵdyry jaıly baıandaıdy. Olar qoǵamda áıel quqyǵy taptalyp jatqanyna shydamaı, kúresýge bel býady.
Jeltoqsan aıynyń basynda, Táýelsizdiktiń 30 jyldyǵy qarsańynda Qazaqstan telearnasy túsirgen 6 tarıhı serıaldyń tanystyrylymy ótti.
QR Aqparat jáne qoǵamdyq damý mınıstrliginiń qoldaýymen «Jáńgir han. Saraı syry», «Ahmet. Ult ustazy», «Domalaq ana», «Táshenev. Taıtalas», «Qanysh. Qazyna», «Muqaǵalı. Bul ǵasyrdan emespin» tarıhı telehıkaıalary túsirilgen bolatyn. Bul toptamalardyń alǵashqy legi kórermen qaýymǵa byltyr jol tartty.
