Tarıhı sát: aqtóbelik jyrshylar álem rekordyn ornatty
AQTÓBE. KAZINFORM — Azııa men Afrıka elderi boıynsha GBR álemdik rekordtar kitabynyń bas ofıtseri Qýandyq Qudaıbergenov rekord ornatylǵanyn resmı habarlady.
Aqtóbedegi Halyq shyǵarmashylyǵy ortalyǵynda tarıhı sát tirkeldi. «Er Edige» jyr mektebiniń tárbıelenýshileri álem rekordtary kitabyna endi. Olar táýlik boıy jyr aıtty.
— Bul taza ádebı rekord. Bizdiń aramyzda eposty biletin adam bolmady. Sondyqtan ǵalymdardy jıyp, «múmkin be» dep surap, sony taldadyq. Daıyndyqqa eki apta ýaqyt ketti. Sonymen birge arnaıy mamandar jyrlaý kezinde qatysýy tıis edi. Osy talaptar oryndalyp, keldik. Birinshiden, jyrdyń jazba nusqasy bolýy tıis. Ekinshiden aýdıo, qaǵaz túrinde qosalqy kómek bolmaýy tıis. Úshinshiden, toqtamaýy tıis. Úzilistiń ózi 1 mınýttan aspaýy tıis. Úzilis te dombyranyń buraýyn keltirýge, oryndyqtardy aýystyrýǵa ǵana beriledi. Tórtinshiden, elektr qýaty úzilissiz berilýi tıis. Besinshiden, tsıfrly túrde 24 saǵat jazylýy kerek boldy. Óıtkeni muny biz 192 elge jarııalaımyz. Bir táýlikte 6 ret esep berdim. Tikeleı efırge de shyǵyp otyrdym. Ony taǵy 4 maman baqylap otyrdy, — dedi Azııa men Afrıka elderi boıynsha GBR álemdik rekordtar kitabynyń bas ofıtseri Qýandyq Qudaıbergenov.
Aıta keteıik, uıymdastyrý kezinde kemshilik, qıynshylyq tirkelmedi. Órt sóndirý, dárigerler brıgadasy jumys istedi. Tamaqtaný, tynyǵý orny qarastyryldy.
— Bul rekordty 36 adamnan basqa uıymdastyrýǵa taǵy 13 adam qatysty. Keshe jyr jobasy saǵat 11:36–da bastaldy. Búgin 11:30–da habarlama keldi. Joba kezinde 51 myń jol aıtyldy. Qazaqstannyń batysynyń jyrdy oryndaý maqamy basqasha eken. Jyldam aıtady. Bári sátti ótti, jyr jobasy álemdik rekordtar kitabyna enedi, — dedi Qýandyq Qudaıbergenov.
Eske salsaq, aldymen nasıhat termesi, halyq ánderi jyrlandy. Al II, III, IV bólimderde «Qyrymnyń qyryq batyry» jyrlanady. V–VI bólimde «Dinı qıssala» men «Nasıhat» termeleri aıtylady.
