«Tarıhı sana jáne qoǵamnyń rýhanı qaýipsizdigi» sarapshylar klýbynda talqylandy
ASTANA. QazAqparat - QR Aqparat jáne kommýnıkatsııalar mınıstrliginiń «Ortalyq kommýnıkatsııalar qyzmeti» alańynda táýelsiz sarapshylar klýby óz jumysyn bastady.
Atalmysh klýbtyń ataýy- «SarapTime». Jańa alańda «SarapTime» sarapshylar klýbymen kóterilgen alǵashqy taqyryp - qazaqstandyqtar úshin tarıhı mańyzy zor 31 mamyr - Saıası qýǵyn-súrgin qurbandary kúnine baılanysty boldy. Basty maqsaty - Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasy jáne saıası qýǵyn - súrgin qurbandaryn bolashaq jas urpaqqa jete túsindirý bolyp tabylady.
Aıta ketý kerek, búgingi tańda óskeleń urpaqqa patrıottyq tárbıe berý máselesine jańasha kóqaras turǵysynan qaraýdy jáne olardyń patrıottyq sana-sezimin, sapalaryn, minez-qulqyn qalyptastyrýdy kózdeıtin tárbıeniń formalary men ádisteri jetildirilip keledi.
N.Á.Nazarbaev óziniń «Qazaqstan- 2030» Joldaýynda «bizdiń balalarymyz ben nemerelerimiz babalarynyń ıgi dástúrin saqtaı otyryp qazirgi zamanǵy naryqtyq ekonomıka órkendeý ústindegi kúlli álemge áıgili ári syıly óz eliniń patrıottary bolady» dep naqty kórsetken bolatyn.
«Tarıhı sana jáne qoǵamnyń rýhanı qaýipsizdigi» atty taqyryppen ótken klýb otyrysy jastardyń boıynda belsendi azamattyq ustanym men óziniń jáne eliniń bolashaǵy úshin jaýapkershilikti seziný qasıetin qalyptastyrý, olardyń ótken ǵasyrdaǵy saıası qýǵyn-súrgin qurbandaryna qurmetpen qaraýyna baǵyttalǵan. Sondaı-aq otanymyzdyń tarıhyn bilip zerdeleýge - búkil qoǵamnyń mańyzdy mindeti bolyp tabylady.
Sarapshylar otyrysyna qatysqan Halyqaralyq Túrki akademııasynyń prezıdenti Darhan Qydyráli ótken ǵasyrda «jeti basty jalmaýyz» ispetti aranyn asha kelgen náýbetter halqymyzdy birjola joıyp jiberýge shaq qalǵanyn aıtty. «Egemen Qazaqstan» gazetiniń basshysy 1916 jyldan bergi qazaq tarıhyn «jeti aǵaıyndy jut» mekendegen alapat apat kezeńderine jatqyzdy.
«Alapat apat 1916 jylǵy Ult- azattyq kóterilisinen bastaldy. Bodandyq ezgige qarsy bas kótergen halyq aıaýsyz basyp janshyldy. Sonyń saldarynan beıbit aýyldar, beıkúná jandar qyrǵynǵa ushyrap, qazaq údere kóship, shekara asýǵa májbúr boldy», - dep Darhan Qydyráli, ekinshi jáne úshinshi jutqa - Aqpan tóńkerisi men Qazan tóńkerisin, tórtinshi «aǵaıynǵa» - alapat ashtyqty, besinshi jutqa - tárkileý naýqanyn, altynshy apatqa - ujymdastyrý naýqanyn jatqyzdy.
«Juttyń jetinshi aǵaıyny - 1937- 38 jyldardaǵy saıası-qýǵyn súrgin. Bul - el basyna túsken eń sumdyq zulmattyń biri edi. Óıtkeni, bul náýbet halqymyzdyń aqyl-oıyn, elge pana, jurtqa basshy bolǵan Alash arystaryn - ult zııalylaryn qynadaı qyrdy», - dep Darhan Qydyráli bul kúnniń tarıhı mańyzyn meılinshe tolyq aıtyp berdi.
Іs-sharanyń shymyldyǵyn QR Parlamenti Májilisiniń depýtaty Dýlatbekov Nurlan Orynbasaruly «Urpaqtar umytpaıdy» taqyrybymen ashty. Sonymen qatar, basty spıkerler retinde «Sakraldy Qazaqstan» ǵylymı-zertteý ortalyǵynyń basshysy Berik Ábdiǵalıuly, «Ulaǵat» Mádenıet jáne damý qorynyń atqarýshy dırektory jáne «Áleýmet tynysy» jýrnalynyń bas redaktory Jumaqasova Qamajan Gabdrashqyzy, Qazaqstan Ulttyq arnasynyń analıtık-redaktory Bekbaýov Nurbek Serikuly sóz sóıledi.
Dóńgelek ústeldiń basty qonaqtary bolyp QR Parlamenti Májilisiniń depýtattary, qoǵam qaıratkerleri, jýrnalıster men blogerler, Astana qalasynyń oqý oryndarynyń stýdentteri shaqyryldy.
