Tarıhı otanymdy umytqan emespin – jas tennısshi Sonıa Jıenbaeva

ASTANA. KAZINFORM — Qazaqstandyq jas tennısshi Sonıa Jıenbaeva taıaýda alǵash ret eresekter arasyndaǵy ITF World Tennis Tour týrnırinde chempıon atandy. Sonymen qatar S.Jıenbaeva jaóspirimder arasynda álemdik reıtıngide 30-orynda tur. Qazaqstandyq tennısshi osynaý tyrnaqaldy tabysy men bolashaq oı-josparlary jóninde Kazinform tilshisine áńgimelep berdi.

- Sonıa, eresekter arasyndaǵy alǵashqy jeńisińiz qutty bolsyn! Bul 17 jastaǵy tennısshi úshin asa mańyzdy shyǵar? 

- Kóp rahmet, qazaqstandyq BAQ ókiline birinshi ret suhbat berip otyrmyn. Men bastapqy kásibı tıtýlǵa qol jetkizgenime qýanyshtymyn, óıtkeni munyń ońaılyqpen kelmeıtinin jaqsy bilemin. Antalııa meniń júregimde árdaıym saqtalady, óıtkeni osynda eresekter arasynda alǵashqy júldemdi jeńip aldym. Shynymdy aıtsam, budan da zor tabystarǵa jetemin dep oılaımyn, sebebi óz komandammen birge atqaryp jatqan jumysym óziniń ıgi jemisin berýi múmkin. 

- Ótken jyly tarıhı otanyńyzǵa oralyp, Qazaqstan azamattyǵyn alýǵa bekindińiz. Bul óz sheshimińiz be?

- Men Almaty qalasynda dúnıe esigin ashtym, anam – qazaq, ákem – nemis. Úsh jasqa tolǵanda, Germanııaǵa ketippiz. Ol elde tursam da, Qazaqstandy eshqashan umytqan emespin. Óıtkeni munda kóptegen týystarym turady, sondyqtan tarıhı otanymmen baılanysty úzgen emespin. Iá, Qazaqstan azamattyǵyn alý meniń óz sheshimim boldy, oǵan esh ókinbeımin. Men eki jasqa tolǵanda, ákemmen birge Almatydaǵy kortqa bardym. Sondyqtan alǵashqy qadamymdy Qazaqstanda jasadym. 

- Qazaqstan quramasyna úırenip kettińiz be? Áleýmettik jelide Arýjan Saǵyndyqova, Asyljan Arystanova, Ámir Omarhanov sekildi jas tennısshilermen til tabysqanyńyz kórinip tur, solaı ma?

- Bári keremet, komandadaǵy dostarymnyń jyly qabyldaǵanyna bek rızamyn. Men kishkentaı bolǵan kezde anam qazaqstandyq oıynshylarǵa erekshe qurmet bildiretin. Sondyqtan olardyń kóbimen jasóspirim kezinde-aq tanysyp, aralasyp kettim. 

- Jýyrda Qazaqstan quramasy Bıllı Djıng Kıng kýboginiń irikteý matchynda Japonııaǵa ese jiberdi. Qarasha aıynda komanda álem chempıonatynyń pleı-off kezeńinde baq synamaqshy. Quramaǵa shaqyrsa, barýǵa daıynsyz ba?

- El namysyn qorǵaý – ár sportshy úshin úlken qurmet. Men mundaı múmkindik týý sátin asyǵa kútemin. Ulttyq quramanyń alǵa qoıǵan maqsatyna jetýine kómektesý úshin qoldan kelgenniń bárin jasaımyn. 

- Sonıa, aldaǵy josparlaryńyz qandaı?

- Bıyl maýsym aıynda 18-ge tolamyn. Sondyqtan ITF jasóspirimder týryndaǵy jarystardy aıaqtaımyn. Alda jasóspirimder arasynda úsh «Úlken dýlyǵa» týrnıri tur. Sonyń birinshisi – Rolan Garros ıek astynda. «Úlken dýlyǵa» dodasynda oınaýdyń áseri bólek. Kelesi jyldan bastap eresekter arasyndaǵy jarystarǵa qatysamyn. Maǵan qoldaý kórsetkeni úshin Bolat Ótemuratov bastaǵan Qazaqstan tennıs federatsııasyna, barsha jankúıerlerge alǵysymdy bildiremin. Sizderdiń senimderińizdi aqtaý úshin bar kúshimdi salamyn. 

Eske sala keteıik, budan buryn Beıbit Juqaevtyń Meksıkadaǵy jarystyń ekinshi aınalymyna ótkenin jazǵan bolatynbyz.