Tarıhı oryndar qazba jumystarynan keıin qaraýsyz qalmaýy tıis - ǵalym

AQTAÝ. QazAqparat – Arheologııalyq jádigerler tabylyp, qazba jáne zertteý jumystary júrgizilgen tarıhı oryndar qaraýsyz qalmaýy tıis. Aqtaýda ótip jatqan «Tarıh tolqynyndaǵy Mańǵystaý» halyqaralyq ǵylymı konferentsııasy barysynda ázerbaıjandyq ǵalym osyndaı másele kóterdi, dep habarlady QazAqparat tilshisi.

«Biz arheologııalyq jádigerlerdi taýyp, qazba jáne zertteý jumystaryn júrgizgennen keıin, bul tarıhı oryndardy qaraýsyz qaldyrmaý máselesin de qatar kóteremiz. Óıtkeni, san ǵasyrlar boıy jer astynda jatqan muralar ashylyp, kórinip jatqandyqtan, olarǵa jel, jańbyr sııaqty faktorlar keri áser etýi múmkin. Biz osynyń aldyn alyp, tıimdi sharalardy qoldanýymyz qajet», - dedi konferentsııaǵa arnaıy shaqyrylǵan Ázerbaıjan qurylys jáne arhıtektýra ǵylymı zertteý ınstıtýtynyń professory Nızamı ıÝsıfov.

Elimizdiń arheologııalyq jáne arhıtektýralyq eskertkishteriniń 35-40%-y Mańǵystaý oblysynda, Ústirt jazyǵynda ornalasqan. Birqatary keıingi on jyl kóleminde júrgizilgen arheologııalyq jumystar nátıjesinde anyqtaldy.

«Mańǵystaý – erte tas ǵasyrynan bastap, osy kúnge deıin kóptegen obektiler saqtalǵan baı ólke. Mundaǵy jerasty meshitteri men balbal tastar, petroglıfterdiń qazaq mádenıetin damytýdaǵy róli zor», - deıdi Batys Qazaqstan ınnovatsııalyq-tehnologııalyq ýnıversıtetiniń professory, fılosofııa ǵylymdarynyń doktory Murat Qalmenov.

Konferentsııa Mańǵystaýdaǵy tarıhı-mádenı eskertkishterdi saqtaý, qorǵaý joldaryn qarastyrýdy maqsat etedi. Sharaǵa Qazaqstannan bólek, Reseı, Ázerbaıjan, Ózbekstan jáne Túrkııa elinen 30-ǵa tarta ǵalym shaqyrylǵan.