Tarıhı oqıǵa: Melanııa Tramp BUU Qaýipsizdik keńesi otyrysyna tóraǵalyq etedi
ASTANA. KAZINFORM — Naýryz aıynda AQSh-qa BUU Qaýipsizdik Keńesindegi rotatsııalyq tóraǵalyq ótedi. AQSh prezıdentiniń jubaıy alǵash ret Qaýipsizdik keńesiniń otyrysyna tóraǵalyq etedi. Bul BUU tarıhyndaǵy alǵashqy jaǵdaı. Melanııa Tramp balalar, tehnologııalar jáne bilim berý taqyrybynda sóz sóıleıdi. Bul týraly DW jazdy.
AQSh prezıdenti Donald Tramptyń jubaıy Melanııa Tramp 2 naýryz kúni BUU Qaýipsizdik keńesiniń otyrysyna tóraǵalyq etedi. Bul týraly X áleýmettik jelisinde AQSh-tyń BUU janyndaǵy turaqty ókili Maık Ýoltts habarlady.
«Melanııa Tramp AQSh-tyń birinshi hanymy retinde alǵash ret Qaýipsizdik keńesinde tóraǵalyq etedi — ári bul Amerıka keńestegi tóraǵalyǵyn bastaǵan alǵashqy kúni bolady», dep jazdy ol. «BUU-ny qaıtadan uly eteıik!», dep qosty Ýoltts.
Melanııa Tramptyń keńsesinde onyń baıandamasy «Qaqtyǵys jaǵdaıyndaǵy balalar, tehnologııalar jáne bilim berý» taqyrybyna arnalatyny naqtylandy. Negizgi basymdyq bilim berýdi álem boıynsha tózimdilik pen beıbitshilikti ilgeriletýdiń quraly retinde qarastyrýǵa beriledi.
Melanııa Tramp buǵan deıin Reseıdiń Ýkraınaǵa qarsy basqynshylyǵy barysynda áketilgen ýkraınalyq balalardy Kıevke qaıtarý máselesin qoldap sóılegen edi.
«BUU ókiliniń málimetinshe, bul 15 músheden turatyn Qaýipsizdik keńesiniń otyrysyna qazirgi álemdik kóshbasshynyń jubaıy alǵash ret tóraǵalyq etetin jaǵdaı bolmaq», dep habarlady Reuters agenttigi.
Ádette Qaýipsizdik keńesiniń otyrystaryna rotatsııa boıynsha eldiń elshisi nemese joǵary laýazymdy mınıstri tóraǵalyq etedi.
Burynǵy AQSh birinshi hanymy Eleonora Rýzvelt BUU aıasynda Adam quqyqtarynyń jalpyǵa birdeı deklaratsııasy jobasyn ázirleýge atsalysqanyn The Guardian gazeti de eske saldy.
Aıta keteıik, aqpan aıynyń basynda Melanııa Tramp týraly fılmniń premerasy kórermensiz ótip, sátsizdikke ushyrady.
