Tarıhı-mádenı murany qorǵaý salasyndaǵy lıtsenzııalaý júıesi jetildirildi
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine tarıhı-mádenı mura obektilerin qorǵaý jáne bilim berý-saýyqtyrý qyzmetteri máseleleri boıynsha ózgerister men tolyqtyrýlar engizý týraly» Zań eki oqylymda qaralyp, maquldandy
Zańnyń maqsaty - tarıhı-mádenı mura obektilerin jáne bilim berý-saýyqtyrý qyzmetterin qorǵaý salasyndaǵy zańnamany jetildirý.
Senator Aıgúl Qapbarova qujattyń negizgi erejelerine toqtaldy. Bul rette, tarıhı-mádenı mura obektilerin qorǵaý jáne paıdalaný salasyndaǵy qyzmetti lıtsenzııalaý júıesin jetildirý eskerilgen. 5 jyl merzimge lıtsenzııanyń eki túrin berý kózdeledi. Birinshisi – tarıh jáne mádenıet eskertkishterinde ǵylymı-restavratsııalaý jumystaryn júzege asyrý jónindegi qyzmet, ekinshisi – arheologııalyq jumystardy júzege asyrý jónindegi qyzmet.
Sonymen qatar, Ulttyq arheologııalyq qyzmetti qurý jáne onyń jumysyn reglamentteý qarastyrylǵan. Arheologııalyq jumystar barysynda anyqtalǵan tarıhı-mádenı mura obektileri týraly málimetterdi jınaqtaý úshin arheologııalyq jumystar boıynsha biryńǵaı avtomattandyrylǵan aqparattyq júıeni qurý eskerilgen.
Atap aıtqanda, zańda mynadaı jańashyldyqtardy engizý kózdelgen:
– tarıhı-mádenı mura obektilerin qorǵaý maqsatynda jer ýchaskelerin berý jáne jerdi paıdalaný tártibin jetildirý;
– arheologııalyq oljalar men arheologııalyq materıaldardy berý, saqtaý jáne paıdalaný tártibin retteý;
- jalpy arheologııalyq oljalar men arheologııalyq materıaldardy ortalyqtandyryp jınaý, shoǵyrlandyrý jáne saqtaý úshin Jalpy arheologııalyq oljalar men arheologııalyq materıaldardyń memlekettik qory men ulttyq depozıtarııin qurý;
– arheologııalyq jumystardy olardyń ereksheligi men qarjylandyrý tetigin eskere otyryp, jospardan tys jáne josparly arheologııalyq jumystarǵa bólý;
– tarıhı-mádenı mura obektilerin qorǵaý jáne paıdalaný jónindegi jumys istep turǵan uıymdar qyzmetiniń biryńǵaı tártibin aıqyndaý;
– arheologııalyq jumystardy júrgizý kezinde tehnıkalyq quraldardy paıdalaný tártibin retteý;
– arheologııalyq jumystar barysynda anyqtalǵan tarıhı-mádenı mura obektileri úshin qorǵaý aımaqtaryn belgileý.
Budan basqa, zańda kámeletke tolmaǵandarǵa bilim berý jáne saýyqtyrý qyzmetterin kórsetetin qosymsha bilim berý uıymdarynyń qyzmetin jetildirý jónindegi normalar qamtylǵan.
Bıyl qazan aıynda Parlament Májilisi tarıhı-mádenı mura obektilerin qorǵaýdy kózdeıtin zańdy talqylaǵanyn jazǵan edik.