Tarıhı eskertkishter men mýzeılerdi retke keltirýimiz kerek — Memleket basshysy
ASTANA. KAZINFORM — Medıatsııa ınstıtýty kez kelgen kıkiljińniń aldyn alyp, qoǵamdaǵy turaqtylyq pen qaýipsizdikti nyǵaıtatyn ámbebap ári pármendi tetik. Bul týraly Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev aıtty.
— Meniń oıymsha, ortaq mádenı muramyzdy kózdiń qarashyǵyndaı saqtaý, dáripteý aıryqsha mańyzǵa ıe. Mundaı baı muraǵa memlekettik shekara bóget bolmaýǵa tıis. Semeıdegi Fedor Dostoevskııdiń ádebı-memorıaldyq mýzeıinde kúrdeli rekonstrýktsııa bastaldy. Bul jumys tolyqtaı demeýshi qarajaty esebinen atqarylady. Aldaǵy ýaqytta elimizdegi basqa da tarıhı eskertkishter men mýzeılerdi retke keltirýimiz kerek. Qazaqstannyń aýqatty azamattary atalǵan izgi bastamaǵa belsendi atsalysady dep oılaımyn, — dedi Prezıdent.
Memleket basshysynyń paıymynsha, medıatsııa ınstıtýtyna qoldaý kórsetý qajet. Óıtkeni bul — kez kelgen kıkiljińniń aldyn alyp, qoǵamdaǵy turaqtylyq pen qaýipsizdikti nyǵaıtatyn ámbebap ári pármendi tetik.
— Sonymen qatar aldymyzda jastardyń jáne sport uıymdarynyń, eriktiler jelisiniń, qaıyrymdylyq qorlarynyń jumysyna, Analar men Aqsaqaldar keńesiniń qyzmetine tyń serpin berý mindeti tur. Birneshe jyl buryn elimizdi buryn-sońdy bolmaǵan sý tasqyny ábigerge saldy. Sol kezde etnomádenı birlestikterdiń ókilderi zardap shekken aımaqtarǵa úlken kómek kórsetti — qalpyna keltirý jumystaryna atsalysyp, qıyn jaǵdaıǵa tap bolǵan adamdardy jubatty, — dedi Qasym-Jomart Toqaev.
Prezıdenttiń aıtýynsha, memleket shyn nıetpen jasalǵan bul eńbekti baǵalaıdy, halqymyz jaqsylyqty eshqashan umytpaıdy.
— Eldiń yntymaq-birligi, jasampaz otanshyldyǵy jarqyraı kóringen osy mysal kelesi urpaq ǵıbrat alatyn beıne jáne fotoqujattarda saqtalyp qalýǵa tıis. Jankeshtilik pen janashyrlyqtyń úlgisin kórsetken mundaı sátter az emes. Sondyqtan jańartylǵan saıası júıede Qazaqstan halqy assambleıasynyń tarıhı róli esh kemimeıdi, kerisinshe, kúsheıe túsedi, — dedi Memleket basshysy.
Aıta keteıik, jıyn barysynda Prezıdent Konstıtýtsııa ár adamnyń qolynda júretin, jumys ústelinde turatyn qujat bolýǵa tıis ekenin aıtty.
