Tarıhı-dinı jádiger seksen jyldan keıin Shyńǵyrlaýǵa oraldy – BQO
ORAL. QazAqparat – 1930 jyldary Shyńǵyrlaý aýdany ortalyǵynda musylmandar meshiti jabylyp, onyń tóbesine ornatylǵan temirden soǵylǵan aı belgisi kúl-qoqysqa tastalady.
Ony sol kezde Shyńǵyrlaýda turǵan Mináýra Bektemirova taýyp alyp, saqtaıdy. Atalmysh tatar otbasy toqsanynshy jyldary Orynborǵa qonys aýdarady. Muny aýdan turǵyny Myrzabolat Qýanaevtan estigen aýdandyq «Serpin» gazetiniń redaktory Adaq Shotpanov Orynborda turatyn Bektemirovter otbasyna habarlasady. Sóıtse, «temir aı» M.Bektemirovanyń uly, qazir zeınetker, jasy seksenge jetse de, jumystan qalmaı júrgen Ashattyń qolynda bolyp shyqty.
Jýyrda Ashat aqsaqal Shyńǵyrlaýǵa kelip, kóne jádigerdi shyńǵyrlaýlyqtarǵa tabys etti. «Nur Otan» partııasy aýdandyq fılıaly tóraǵasynyń birinshi orynbasary Tilegen Qalıev mundaı jádigerdiń qasıetti ramazan aıynda elge oralyp otyrǵanyn atap ótti. Shyńǵyrlaýda týyp-ósip, elý jyldaı turǵan A.Bektemirovke alǵys aıtylyp, ıyǵyna shapan jabyldy.
