Tarıhı derekterdi tsıfrlandyrý: oqýshylar ınnovatsııalyq sheshim usyndy
ASTANA.KAZINFORM - Daryn FIRST Qualifier 2026 robottar festıvali óz máresine jetti.
Oqý-aǵartý mınıstrligi málimetinshe, is-sharaǵa Almaty qalasy, Almaty jáne Jetisý oblystarynan, sondaı-aq mamandandyrylǵan bilim berý uıymdarynan 200-ge jýyq komanda men 1500-den astam oqýshy qatysty. Eki kún boıy 4-18 jas aralyǵyndaǵy qatysýshylar ınjenerııa, baǵdarlamalaý jáne robototehnıka baǵyttary boıynsha óz bilimderi men praktıkalyq daǵdylaryn kórsetti.
Festıval FIRST halyqaralyq baǵdarlamasynyń tórt sanaty boıynsha uıymdastyryldy: FIRST LEGO League Discover, FIRST LEGO League Explore, FIRST LEGO League Challenge jáne FIRST Tech Challenge.
2025-2026 oqý maýsymynyń taqyryby — arheologııa. Maýsym aıasynda qatysýshylar adamzat tarıhyn zerdeleý, mádenı murany saqtaý jáne ótkenniń qupııalaryn zamanaýı tehnologııalar arqyly zertteýge baǵyttalǵan jobalar ázirledi.
Komandalar arheologııalyq zertteýlerge qatysty ózekti máselelerdi taldap, robottar kómegimen ınjenerlik tapsyrmalardy oryndady, sondaı-aq tarıhı derekterdi tsıfrlandyrý men saqtaý boıynsha ınnovatsııalyq sheshimder usyndy.
Festıval qorytyndysy boıynsha 29 úzdik komanda halyqaralyq deńgeıdegi kelesi kezeńderge — Kazakhstan Central Asia FIRST Championship 2026 jarysyna joldama aldy.
Atalǵan chempıonat 2026 jylǵy aqpan aıynda Astana qalasynda ótedi.
Aıta keteıik, Pavlodarda «Jas daryn» mektebiniń oqýshylary jetim balalarǵa sabaq úıretip júr.