Tarıhı ańyzdardyń ornyna progreske baǵyttalǵan pánderdi oqytý qajet – Prezıdent
ASTANA. KAZINFORM – Memleket basshysy Qasym-Jomart Toqaev tarıhı ańyzdar men shyndyqqa saı kelmeıtin oqıǵalardyń ornyna progreske baǵyttalǵan bilim berý qajettigin aıtty. Bul baǵytta «Keleshek mektepteri» aldaǵy úsh jylda bilim berýdiń ozyq tájirıbeleri men ınnovatsııalyq sheshimderi synaqtan ótetin ortalyqqa aınalýǵa tıis.
Qasym-Jomart Toqaev Prezıdent Ákimshiligine Úkimetpen birlesip, tómen nátıje kórsetken oblystarǵa naqty kómek kórsetýdi, mysaly, arnaıy taldaý júrgizýdi tapsyrdy.
– Al Úkimet bilim júıesiniń tıimdiligin arttyra túsetin jan-jaqty zerttelgen sheshimder usynýǵa tıis. Bul máselede jetistikke ıe bolǵan mektepter men damý ınstıtýttarynyń múmkindikterin keńinen paıdalanǵan jón, – dedi Qasym-Jomart Toqaev elordada respýblıkalyq Tamyz keńesinde.
Bul rette quzyrly mınıstrlik orta bilim mazmunyn zaman talabyna saı jańǵyrtýy qajet.
– Mysaly, tarıhı ańyzdar men shyndyqqa saı kelmeıtin oqıǵalardyń ornyna óskeleń urpaqqa ilgerileýge, progreske baǵyttalǵan pánderdi oqytý qajet. Al tıisti baǵdarlamalardy daıarlaý – mınıstrliktiń jedel maqsaty, – dep atap ótti Prezıdent.
«Keleshek mektepteri» ınnovatsııalyq sheshimderdi engizý jáne ulttyq bilim berý úlgisin qalyptastyrý isinde mańyzdy ról atqarýy kerek.
– Osy oraıda Ybyraı Altynsarın atyndaǵy Ulttyq bilim akademııasyna zor jaýapkershilik júkteledi. Aldaǵy úsh jylda «Keleshek mektepteri» bilim berýdiń ozyq tájirıbelerin synaqtan ótkizetin ortalyqqa aınalýǵa tıis, – dedi Memleket basshysy.
Buǵan deıin Qasym-Jomart Toqaev Prezıdent «Órleý» ortalyǵyn synǵa alyp, pedagogterdi attestatsııalaý talaptaryn jeńildetýdi tapsyrǵan edi.
Elimizge taǵy bes myńnan astam muǵalim jetispeıdi.
Sondaı-aq Prezıdent elimizdegi mektep qurylysyn jandandyrýdy tapsyrdy.
