Tarıftik saıasat pen QQS qaıta qaraý qajet — qarjy sarapshysy

ALMATY. KAZINFORM — Qarjy sarapshysy Rasýl Rysmambetov QR Ulttyq bankiniń bazalyq mólsherlemeni +/- 1 paıyzdyq tarmaq dálizimen jyldyq 16,5% deńgeıinde belgileý týraly sheshimine qatysty pikir bildirdi

— Meniń oıymsha, bazalyq mólsherlemeniń 1,25%-ǵa, ıaǵnı 15,25%-dan 16,5%-ǵa kóterilýi Qazaqstan tarıhynda buryn-sońdy bolmaǵan jaǵdaı. Munyń negizgi úsh faktory bar. Birinshiden, jahandyq týrbýlenttilik. AQSh-tyń jańa prezıdenti birqatar sheshim qabyldady. Biz soǵan beıimdelýimiz kerek. Ásirese onyń munaı baǵasyn tómendetý týraly urany mańyzdy, bul bizdiń bıýdjetke tikeleı áser etedi. Sondyqtan biz ınflıatsııany tejeýimiz kerek. Ekinshiden, byltyr mamyr aıynda Memleket basshysy «Ekonomıkany yryqtandyrý jónindegi sharalar týraly» Jarlyqqa qol qoıdy. Bul qujat básekelestikti damytý, ekonomıkaǵa memlekettiń aralasýyn qysqartý, bıznes shyǵyndaryn azaıtý arqyly kásipkerlik erkindikti qamtamasyz etýge baǵyttalǵan. Munyń bárin kórip otyrmyz. Úshinshiden, Úkimettiń qosymsha qun salyǵy shegin 20%-ǵa deıin kóterý týraly usynysy ınflıatsııalyq kútýdiń artýyna ákeldi, — dedi Rasýl Rysmambetov.

Sarapshynyń oıynsha, tarıftik saıasatty da, QQS qurylymyn da qaıta qaraý qajet.

Sonymen qatar, spıker 2025-2026 jyldarǵa arnalǵan uzaq merzimdi josparlardy qaıta qaraýdy usyndy.

— Munaıǵa osyndaı belsendi shabýyl jáne QQS-ǵa baılanysty ınflıatsııalyq kútýler bolmaǵanda, jaǵdaı áldeqaıda turaqty bolýy múmkin edi, — dedi sarapshy.

Rasýl Rysmambetov qazir álemde bolyp jatqan jaǵdaıdy eshkim aldyn ala boljaı almaıtynyn tilge tıek etti.

— AQSh, Eýropa, Kanada, Meksıka jáne Qytaı arasyndaǵy tarıf soǵysy — bul jahandyq ekonomıkanyń bir bóligi retinde biz bastan keship jatqan jahandyq ózgeris. Shyn máninde, biz jahandyq tarıf soǵysynyń bastalǵanyna kýá boldyq. Munaı óndirýshi memleket bolǵandyqtan, onyń barlyq saldaryn mindetti túrde sezinemiz. Sondyqtan keıbir josparlardy qaıta qaraý qajet, meniń oıymsha, bul máselelerdiń barlyǵy talqylanatyn úlken jıyn bolady, — dep qosty ol.

Osyǵan deıin Ulttyq bank bazalyq mólsherlemeni kótergeni týraly jazǵanbyz.